विजयकुमार साह
ढल्केबर, जेठ ४ गते । धनुषाको मिथिला नगरपालिका–१०, लालगढस्थित सुनौलो बस्तीबाट प्रहरीले लागुऔषधसहित तीन जनालाई पक्राउ गरेको छ । इलाका प्रहरी कार्यालय ढल्केबर र लागुऔषध ब्युरो बर्दिवास महोत्तरीको संयुक्त टोलीले पक्राउ गरेको हो ।
महोत्तरीको बर्दिवास नगरपालिका–७ घर भई हाल मिथिला नगरपालिका–१०, लालगढमा बस्दै आएका ३० वर्षीय विजय लिम्बु, महोत्तरीको बर्दिवास नगरपालिका–१ निवासी २८ वर्षीय सुमन बुढाथोकी र सोही स्थानमा बस्दै आएका अन्दाजी २७ वर्षीय सागर भनिने मनकुमार लिम्बुलाई लागुऔषधसहित पक्राउ प्रहरीले जनाएको छ ।
इलाका प्रहरी कार्यालय ढल्केबर प्रहरी निरीक्षक लक्ष्मण केसीले सुनौलो बस्तीमा विजय लिम्बुले भाडा गरी बस्दै आएको घरमा रितपूर्वक खानतलासी गर्दा ओछ्यान मुनिबाट लागुऔषध बरामद भएको बताउनुभयो । लिम्बुले घरबाट लागुऔषध बिक्री वितरण गर्ने गरेको सूचनाको आधारमा खानतलासी गरिएको उहाँले जानकारी दिनुभयो ।
प्रहरी निरीक्षक केसीले ओछ्यान मुनि र पक्राउ परेकाहरुको साथबाट गरीे टेन्टाडोल १०० एमजीका कुल ९२ र स्पासरेस्टका ८३ वटा गरी जम्मा १७५ वटा पता ट्याब्लेट बरामद भएको बताउनुभयो । उहाँले प्रहरीले विभिन्न दरका नगद १५ हजार ५२० रुपियाँ र लागुऔषध सेवनपछि प्रयोग गरिएका खोलसमेत बरामद गरिएको जानकारी दिनुभयो । पक्राउ परेकामाथि लागुऔषधसम्बन्धी कसुरमा अनुसन्धान भइरहेको उहाँले बताउनुभयो ।
