गोरखापत्र समाचारदाता
काठमाडौँ, भदौ १४ गते । कलाकार रमेश खनालको अरूपण शैलीमा बनाइएका चित्रको ‘३५ औँ एकल चित्रकला प्रदर्शनी’ भइरहेको छ ।
नेपाल ललितकला प्रज्ञा–प्रतिष्ठानका कुलपति नारदमणि हार्तम्छालीले लाजिम्पाटस्थित अरूपण ग्यालरीमा उद्घाटन गर्नुभएको सो प्रदर्शनीमा खनालका १७ वटा चित्रकला प्रदर्शनीमा राखिएका छन् । उहाँले चित्र बनाउने शैलीलाई छुट्टै नाम अरूपण शैलीका रूपमा पहिचान दिनुभएको छ । कला क्षेत्रमा आफ्नो फरक पहिचानका साथ सिर्जनामा संलग्न कलाकार खनालका अनुसार चित्रकला अवलोकन गर्ने कलाकार, कला सङ्कलक, समीक्षक तथा कला पारखी सबैले एउटै चित्रमा आफ्नो फरक/फरक विचार, अर्थ दिन सक्छन् ।” उहाँ भन्नुहुन्छ, “अमूर्त चित्रहरूको अर्थ यही हो, भन्न सकिन्न । अरूपण शैलीका चित्रमा कलाकारले चित्र बनाएर राखेपछि दर्शकले अवलोकन गरी आफ्नो दृष्टिकोण बनाउन सकिने अवसर दिएका हुन्छौँ, प्रदर्शनीमा राखिएका चित्रकला हेरेर प्रतिक्रिया दिन आग्रह गर्दछौँ ।”
उमेरले ७६ औँ वसन्तमा हिँडिरहनुभएका कलाकार खनालका प्रदर्शनीमा राखिएका चित्र निकै रङ्गीन छन् । हरियो, कालो, रातो, निलो, पहेँलो, सेतोलगायत थुप्रै रङको मिश्रण प्रयोग गरेर रङ्गीन चित्रको संसारसहित कला पारखीमाझ आउनुभएका कलाकार खनालको जोशलाई चित्रले उजागर गर्न सफल भएका छन् ।
देश, विदेशमा समेत एकल चित्रकलाको आयोजना गरिसक्नुभएका कलाकार खनालले अरूपण आर्ट ग्यालरीमार्फत अग्रज कलाकार र कला क्षेत्रका नवप्रतिभालाई समेत चित्रकला प्रदर्शनीको आयोजना गर्ने अवसर प्रदान गर्दै आउनुभएको छ । उहाँले नेपाली कला जगत्का अग्रज कलाकारको सम्मान र नयाँ प्रतिभालाई चित्र बनाउन हौसला दिएर चित्रकलाको पुस्तान्तरणका लागि पनि योगदान दिइरहनुभएको छ ।
नेपाल ललितकला प्रज्ञा–प्रतिष्ठानका प्राज्ञका रूपमा जिम्मेवारी निर्वाह गरिसक्नुभएका कलाकार खनाल र कलाकार रिता खनालले अरूपण आर्ट ग्यालरीमा आर्थिक अवस्था कमजोर भएका बालबालिकाका लागि पनि निःशुल्क कला प्रशिक्षण दिँदै आउनुभएको छ । एक्लै सिर्जनामा नरमाई नयाँ पुस्तालाई पनि चित्रकलासँग परिचित गराउने अभियानमा कलाकार जोडी रमेश खनाल र रिता खनाल सँगसँगै लाग्नुभएको छ ।
