टोपलाल अर्याल
रेसुङ्गा, भदौ १४ गते । जिल्ला प्रशासन कार्यालय र स्थानीय तहबिच महत्त्वपूर्ण आठ निर्णय भएका छन् । जिल्लामा बाँदर, बदेल र वाघजस्ता जंगली वन्यजन्तुहरुको नियन्त्रण, बसाईसराई व्यवस्थापन, वैदेशिक रोजगार र यसले पारेको प्रभाव, बाटोघाटोको अवस्थासँगै दिगो उपयोगको विषयमा स्थानीय तहका उपप्रमुख र सरोकारवालाहरुबिच छलफल गरिएको प्रमुख जिल्ला अधिकारी बिष्णु प्रसाद कोइरालाले जानकारी दिनुभयो ।
त्यस्तै सडक बत्ती, विपद् व्यवस्थापन लगायतका विषयमा विस्तृत छलफल तथा अन्तरक्रिया गरेर नीतिगत व्यवस्था र यसको व्यवहारिक पक्षका सम्बन्धमा बैठकमा उपस्थित सबै पक्षबाट राय परामर्श गरिएको कोइरालाले बताउनुभयो ।
बैठकमा विशेष गरेर स्थानीय तह, प्रदेश मातहतका कार्यालयहरु र जिल्ला प्रशासन कार्यालयबाट हुने अनुगमन, निरीक्षण आवश्यकता अनुसार संयुक्त र एकीकृत रुपमा गर्ने निर्णय भएको छ । स्थानीय तह, सडक डिभिजन कार्यालय, सडक आयोजना र पुर्वाधार कार्यालयबाट निर्माण भएका सडक अवरुद्ध भएमा चाडपर्व अगावै सञ्चालन गर्ने, असल अभ्यासको अवलम्बन र समस्याहरुको समाधानका लागि आवश्यक समन्वय र सहकार्य गर्ने निर्णय भएको छ ।
त्यस्तै जिल्लाको जनसङ्ख्याको संरचना हेर्दा जन्मदर कम रहेको र बसाईसराइँ दर उच्च रहेकाले उक्त समस्याहरु न्यूनीकरण गर्न जनचेतना तथा नीतिहरु बनाउन स्थानीय तहहरुलाई अनुरोध गर्ने निर्णय भएको प्रमुख जिल्ला अधिकारी कोइरालाले जानकारी दिनुभयो ।
बाँदर, बदेल र बाघ लगायतका वन्यजन्तुहरुले वालीनालीमा नोक्सानी गर्ने क्रम वढेकाले बसाईसराइँको वृद्धि भएको निशकर्षसहित सम्बन्धित वन कार्यालयलाई निराकरणका उपायहरु तत्काल लागू गर्न अनुरोध गर्ने, जिल्लामा सञ्चालित विभिन्न आयोजनाहरु गुणस्तरीय रुपमा समयमानै सम्पन्न गर्न सम्बन्धित पक्षलाई अनुरोध गर्ने र बेरुजु समयमानै फस्छ्यौट गरेर बेरुजु शुन्य पार्न सवैले अग्रसरता लिने र यथासक्य चाँडो जिल्ला भित्रका यातायात सवारी साधनहरुको रुट र वैज्ञानिक तवरले भाडा निर्धारण गर्ने, लगायतका विषयमा बैठकमा निर्णय भएको सहायक प्रमुख जिल्ला अधिकारी हरिप्रसाद गैरेले जानकारी दिनुभयो ।
