गोरखापत्र समाचारदाता
काठमाडौँ, भदौ १४ गते । नेपालबाट भैँसीको मासु, दुग्ध पदार्थ, तरकारी फलफूल र जडीबुटी चीन निर्यातका लागि भन्सार प्रशासनमा सहजीकरण र लचकता अपनाउन चीनसमक्ष आग्रह गएिको छ । चीनको भन्सार प्रशासन र कृषि तथा पशुपन्छी मन्त्रालयका उच्च अधिकारीबिच बिहीबार काठमाडौँमा भएको बैठकमा नेपालले गरेको आग्रहलाई चिनियाँ पक्षले सकारात्मक रूपमा लिएको जनाइएको छ ।
बैठकमा नेपालको नेतृत्व कृषि तथा पशुपन्छी विकासमन्त्री रामनाथ अधिकारीले र चिनियाँ पक्षको नेतृत्व चीनको भन्सार प्रशासनका उपमन्त्री वाङ लिङजुनले गर्नुभएको थियो । नेपालबाट प्रशोधित भैँसीको मासु र कुरकुरे हाड (कार्टिलेज) का अतिरिक्त घिउ, नौनी तथा छुर्पी चीन निर्यातका लागि कृषि मन्त्रालयले जोड गरिरहेको छ ।
त्यस्तै हेलेज साइलेज पशु आहारा निर्यातका लागि पनि द्विपक्षीय बैठकमा नेपालले कुरा राखेको कृषि मन्त्रालयले जनाएको छ । नेपाल कुखुराको मासु र पन्जा, तरकारी, सुन्तलाजन्य फलफूल, चिया तथा कफी र जडीबुटी निर्यातका लागि सक्षम रहेको जानकारी दिँदै र त्यसका लागि थप सहजीकरण गरिदिन पनि आग्रह गरिएको छ ।
हाल नेपालबाट ३४ प्रकारका कृषि वस्तु ६१ वटा कम्पनीमार्फत चीन निर्यात हुँदै आएको छ । त्यस्तै हरियो घाँस हेलेज पाँच वटा कम्पनीमार्फत चीन निर्यात हुँदै आएको छ । नेपालले पशु आहारा साइलेज निर्यातका लागि पनि चीनसँग प्रस्ताव गरेको छ । बैठकमा चीनका भन्सार प्रशासनका उपमन्त्री वाङले चीनले नेपालबाट कृषि वस्तु निर्यातको विषयलाई उच्च महत्व दिएको बताउनुभयो । एक सयभन्दा बढी देशबाट यस्ता प्रस्ताव आउने गरेको भए पनि छिमेकी मुलुकका रूपमा चीनले नेपाललाई महत्व दिएर प्रयास अघि बढाएको उहाँले बताउनुभयो ।
व्यापार सहजीकरणका लागि हाम्रो एकल प्रयासले मात्र नुग्ने भन्दै उहाँले दुवै देशको संयुक्त प्रयासमा यो गारो नभएकाले सहजीकरण गर्न आफूहरू तयार रहेको उपमन्त्री वाङले बताउनुभयो ।
कृषिमन्त्री अधिकारीले नेपालबाट मासु निर्यातका लागि आधारभूत सर्त खोरेतमुक्त क्षेत्र घोषणालगायतका प्रक्रियादेखि चीनको क्वारेन्टाइन मापदण्ड पूरा गर्ने प्रयास भइरहेको जानकारी दिनुभएको थियो । उहाँले सुन्तला जातका फलफूल निर्यातका केही सर्तमा लचकता अपनाइदिन आग्रह गर्नुभएको थियो । द्विपक्षीय बैठकमा नेपालको कृषि उपज निर्यातका लागि सहजीकरण गर्न दुवै मुलुकको संयुक्त संरचना स्थापना गर्न नेपालले गरेको प्रस्तावमा चिनियाँ पक्षले सहमति जनाएको छ ।
बैठकमा सचिवद्वय डा. गोविन्दप्रसाद शर्मा र डा. दीपककुमार खराल एवं सहसचिवहरू सहभागी रहनुभएको थियो भने चिनियाँ टोलीमा चीनको भन्सार प्रशासनका अधिकारीहरू हुनुहुन्थ्यो ।
