विनय कर्ण
कल्याणपुर (सप्तरी), भदौ १४ गते । मधेशी आयोगले विवाहसम्बन्धी कानुन र विवाहको उमेर हद कायम सम्बन्धमा सरोकारवालाहरुसँग सुझाव सङ्कलन गरेको छ ।
राजविराजमा शुक्रबार आयोगले विवाहसम्बन्धी अहिलेको कानुन संशोधन गर्ने विषयमा सरकारी तथा जनस्तरबाट व्यापक चर्चा, परिचर्चा र बहस चलिरहेका बेला सरोकारवालाहरुसँग सुझाव सङ्कलन गरेको हो ।
प्रमुख जिल्ला अधिकारी टुवराज पोखरेलको अध्यक्षतामा आयोजित कार्यक्रममा प्रमुख अतिथि आयोगका सदस्य आभासेतु सिंहले विवाहकै विषयलाई लिएर हाल समाजमा भइरहेका विभिन्न हिंसाका घटनालाई मध्य नजर गर्दै विवाहसम्बन्धी कानुनमा संशोधनका लागि सुझाव सङ्कलन गर्न लागिएको बताउनुभयो ।
उहाँले सरोकारबालाबाट प्राप्त राय सुझाव सङ्कलन गरी आवश्यक कार्यार्थका लागि आयोग मार्फत सरकारलाई बुझाइने जानकारी दिनुभयो ।
हाल कानुनमा विवाहको उमेर २० वर्ष कायम रहेकोमा त्यसलाई संशोधन गरी १८ वर्ष उमेर हद कायम गर्नु पर्नेमा सरोकारबालाहरुले जोड दिनुभएको छ ।
उहाँहरुले प्रचलित कानुन र यसले पारेको सकारात्मक र नकारात्मक प्रभाव, सामाजिक परम्परा, जनसङ्ख्याको बनोट, शारिरीक र मानसिक विकासको अवस्था, व्यवहारिक, शैक्षिक र चेतनाको अवस्था, अन्तर्राष्ट्रिय अभ्यास लगायतका विषयमा गहन अध्ययन र विश्लेषण हुनु पर्ने जिकिर गर्दै सुझाव राख्नुभएको थियो ।
कार्यक्रममा उच्च अदालत जनकपुर–राजविराज इजलाशका रजिष्टार लोकनाथ पराजुली, बरख गणका प्रमुख सेनानी शोभित बहादुर चन्द, प्रहरी उपरिक्षक गौतम कुमार केसी, राष्ट्रिय अनुसन्धानका उपनिर्देशक कुलचन्द्र नेपाल, जिल्ला समन्वय अधिकारी कुन्दन कुमार कर्ण, राजविराज नगरपालिकाका प्रमुख प्रशासकीय अधिकृत हरिकिशोर प्रसाद राजवंशी, राजगढ गाउँपालिकाका प्रमुख प्रशासकीय अधिकृत सरोज झाका साथै विभिन्न पालिका र संघसस्थाका प्रतिनिधिहरु समेतले आ–आफ्नो सुझाव दिनुभएको थियो ।
