शेरबहादुर राई
ओखलढुङ्गा, भदौ १३ गते । ओखलढुङ्गाको मानेभञ्ज्याङ गाउँपालिका–७ टोक्सेल समुद्री सतहदेखि १६ सय मिटरको उचाइमा अवस्थित छ । यहाँका बासिन्दाले विगत वर्षौंदेखि पानीको अभावसँग जुध्दै आएका थिए ।
बिहान चाँडै उठेर घाममा हिँड्दै घण्टौँ टाढाको काफलडाँडाका बासिन्दाले आरुबाटतर्फको धारा पानी र जैसीटोलका बासिन्दाले पँधेराटारस्थित धारापानी जानुपर्ने बाध्यता थियो । विर्ताटोल, दमाइगाउँ, सातसलेलगायतका सबै स्थानमा पानीको अभाव थियो ।
काफलकोटसम्म पुगेर पानी ल्याउनु उनीहरूको दैनिक जीवनको हिस्सा थियो । पानी बोक्नुपर्दा महिला, वृद्धवृद्धा र बच्चाहरु सबैले कठिनाइ थियो । सरसफाइ र पशुपालनमा समेत समस्या भइरहेको थियो । तर अब टोक्सेलबासीहरूको जीवनमा सुखद आशा जागेको छ ।
गाउँपालिकाले २६ लाख लागतमा टोक्सेलमा डिप बोरिङ योजना सञ्चालन गरी पानीको व्यवस्था गरेको छ । लामो प्रयासपछि १८० मिटर गहिराइबाट टोक्सेल गाउँमा पानी निकालिएको छ । नागरिकको आवश्यकता बुझेर योजनाअघि बढाइएको गाउँपालिका अध्यक्ष ज्ञानेन्द्र रुम्दालीले बताउनुभयो ।
अध्यक्ष रुम्दालीले भन्नुभयो, “अब घरघरमा पानी पुराउने काम सुरु भएको छ । नागरिकका आधारभूत आवश्यकताहरु पूरा गर्नु हाम्रो कर्तव्य हो ।” यस योजनाबाट ७५ घरमा ‘एक घर, एक धारा’ कार्यक्रममार्फत प्रत्यक्ष लाभ पुग्ने गाउँपालिकाले जनाएको छ ।
गाउँपालिकाका उपाध्यक्ष आश्रचन राईले डिपबोरिङ १८० मिटर गहिराइबाट गरिएको जानकारी दिनुभयो ।
स्थानीयको वर्षौँदेखिको खानेपानीको समस्या अन्त्य हुने विश्वास गरिएको वडा अध्यक्ष विष्णुप्रसाद गौतमले बताउनुभयो । यो स्थानमा करिब ४० वर्षसम्म जमिनमुनीबाट पानी आउने प्राविधिक स्रोतले जनाएको छ ।
टोक्सेलको पँधेराटारमा बोरिङबाट निकालिएको पानीलाई काफलडाँडामा निर्माण गरिएको पानी ट्यांकीमा तानेर सबैतिर वितरण गरिने योजना रहेको बताइएको छ ।
