गोरखापत्र समाचारदाता
काठमाडौँ, भदौ १३ गते । उत्तर कोरियाली नेता किम जोङ उन आउँदो साता बेइजिङमा आयोजना हुन लागेको सैन्य परेडमा सहभागी हुने चीनको विदेश मन्त्रालयले जनाएको छ । किम पहिलो पटक विभिन्न देशका नेताहरू पनि सहभागी हुने समारोहमा उपस्थित हुन लाग्नुभएको हो । चीनले जापानविरुद्ध भएको लडाइँ तथा द्वितीय विश्वयुद्ध टुङ्गिएको ८० औँ वार्षिकोत्सवका अवसरमा ‘भिक्टोरी डे’ परेड आयोजना गर्न लागेको हो । सैन्य परेडमा चीनले सयौँ विमान, ट्याङ्क र ड्रोनभेदी प्रणालीसहित आफ्ना नवीनतम अस्त्रशस्त्र प्रदर्शन गर्ने अपेक्षा गरिएको बिबिसीले जनाएको छ ।
उक्त समारोहमा रुसका राष्ट्रपति भ्लादिमिर पुटिनसहित २६ राष्ट्रका प्रमुखहरू उपस्थित हुने बताइएको छ । समारोहको आयोजना गर्ने चीनलाई शक्तिशाली बनाउने उद्देश्यमा रहेका राष्ट्रपति सी चिनफिङका लागि एउटा महत्वपूर्ण कूटनीतिक उपलब्धि हुने ठानिएको छ । चीनले पहिलो पटक आफ्नो सेनाको नयाँ शक्ति संरचना पूर्ण रूपमा परेडमा देखाउन लागेको छ । सुव्यवस्थित र योजनाबद्ध रूपमा हुने उक्त समारोहमा दसौँ हजार सैनिकले तियान्मेन स्क्वाएर हुँदै परेड गर्ने छन् । परेडका सहभागी हुनेहरू पिएलएका विभिन्न ४५ वटा एकाइका सैनिकहरू र युद्धमा सहभागी भएका भूतपूर्व सैनिक हुन् । राष्ट्रपति सीले तियान्मेन स्क्वाएरबाट अवलोकन गर्ने ७० मिनेट लामो सो परेडलाई विश्लेषकहरू र पश्चिमी शक्तिहरूले ध्यानपूर्वक हेर्ने ठानिएको छ । यसअघि किम सन् २०१९ मा दुई देशबिच कूटनीतिक सम्बन्ध स्थापनाको ७० औँ वार्षिकोत्सवमा भाग लिन चीन जानुभएको थियो । चीनको विदेश मन्त्रालयको बिहीबारको पत्रकार सम्मेलनमा प्योङ्याङको निकटतम सहयोगीमध्येको एक बेइजिङले आफ्ना छिमेकीसँगको दशकौँ लामो परम्परागत मित्रताको कदर गर्ने र दुई देशले क्षेत्रीय शान्ति र स्थिरतामा सहकार्य जारी राख्ने जनाएको छ ।
