• ३ भदौ २०८२, मङ्गलबार

जेलेन्स्कीद्वारा ९० अर्ब डलरको अमेरिकी हतियार योजनाको पुष्टि, त्रिपक्षीय बैठकको मिति अझै अनिश्चित

blog

युक्रेनका राष्ट्रपति भोलोदिमर जेलेन्स्की ।

वासिङ्टन, भदौ ३ गते । युक्रेनका राष्ट्रपति भोलोदिमर जेलेन्स्कीले सोमबार (स्थानीय समय) युक्रेनले आफ्नो सुरक्षा ग्यारेन्टीको एक हिस्साका रूपमा युरोपेली कोषमार्फत ९० अर्ब डलर मूल्यका अमेरिकी हतियार खरिद गर्ने योजनाको पुष्टि गर्नु भएको छ ।

तर रुसी राष्ट्रपति भ्लादिमिर पुटिन र अमेरिकी राष्ट्रपति डोनाल्ड ट्रम्पसँगको प्रस्तावित त्रिपक्षीय बैठकको मिति भने अझै अनिश्चित छ । “मिति ? होइन, होइन, छैन । हामीसँग कुनै मिति छैन । हामीले भर्खरै राष्ट्रपति र त्यसपछि हाम्रा सबै सहकर्मी र साझेदारसँगको यो फलदायी बैठकपछि पुष्टि गर्यौँ, जसले हामी त्रिपक्षीय बैठकका लागि तयार छौँ भन्ने देखाउँछ”, जेलेन्स्कीले भन्नुभयो, “यदि रुसले संयुक्त राज्य अमेरिकाका राष्ट्रपतिलाई द्विपक्षीय प्रस्ताव गर्छ भने, त्यसपछि हामी त्यसको परिणाम हेर्ने छौँ, अनि पछि यो त्रिपक्षीय हुन सक्छ । त्यसैले मैले यो सम्पूर्ण कार्यक्रम स्पष्ट पारेँ । युक्रेन शान्तिको बाटोमा कहिल्यै रोकिने छैन र हामी कुनै पनि ढाँचाका लागि तयार छौँ, तर नेताहरूको स्तरमा ।”

ह्वाइट हाउसमा अमेरिकी राष्ट्रपति डोनाल्ड ट्रम्प र युरोपेली नेतासँगको वार्तापछि आयोजित सम्मेलनमा जेलेन्स्कीले यस्तो टिप्पणी गर्नुभएको हो । उहाँले युक्रेनले आफ्नो सुरक्षा ग्यारेन्टीको एक हिस्साका रूपमा युरोपेली कोषमार्फत ९० अर्ब डलर मूल्यका अमेरिकी हतियार खरिद गर्ने योजनाबारे छलफल भएको पनि बताउनुभयो । ग्यारेन्टीको अर्को भागमा युक्रेनले ड्रोन निर्माण गर्ने छ र यसको केही हिस्सा अमेरिकाले खरिद गर्ने छ । जेलेन्स्कीका अनुसार अझै कुनै औपचारिक सम्झौता भएको छैन, तर सम्झौता आगामी हप्ता वा १० दिनमा औपचारिक हुने अपेक्षा गरिएको छ ।

एक्समा पोस्ट गर्दै जेलेन्स्कीले लेख्नुभयो, “आज वासिङ्टनमा महत्वपूर्ण वार्ता भयो । हामीले राष्ट्रपति ट्रम्पसँग धेरै विषयमा छलफल गर्यौँ । यो लामो र विस्तृत कुराकानी थियो, जसमा युद्धको मैदानको अवस्था र शान्ति नजिक ल्याउनका लागि हाम्रा कदमबारे छलफल भयो । युरोपेली नेता र अमेरिकी राष्ट्रपतिसँग पनि एउटै ढाँचामा धेरै बैठक भए ।” “हामीले सुरक्षा ग्यारेन्टीबारे छलफल गर्यौँ । यो युद्ध अन्त्यतर्फको एउटा प्रारम्भिक विन्दु हो । यी ग्यारेन्टीलाई समर्थन गर्ने र यसको हिस्सा बन्ने तयारीबारे अमेरिकाबाट आएको महत्वपूर्ण सङ्केतलाई हामीले कदर गर्दछौँ”, उहाँले भन्नुभयो, “आजको छलफलमा हाम्रो बालबालिकाको फिर्ती, रुसद्वारा बन्दी बनाइएका युद्धबन्दी र नागरिकहरूको रिहाइमा विशेष ध्यान दिइयो । यस विषयमा हामी काम गर्ने सहमतिमा पुगेका छौँ । अमेरिकी राष्ट्रपतिले नेताको स्तरमा हुने बैठकलाई पनि समर्थन गर्नुभएको छ । संवेदनशील मुद्दा समाधान गर्न यस्ता बैठकहरू आवश्यक हुन्छन् ।” रासस/एएनआई