बाबुराम देवकोटा
सिन्धुलीमाढी, साउन १२ गते । सिन्धुलीको गोलन्जोर गाउँपालिका–६, छेत्पा नजिक भण्डास विप्परकटेरीमा एकै घरका लोपोन्मुख हायु परिवारका १६ जना चार दिनदेखि सम्पर्कविहीन भएका छन् ।
बिहीबार दिउसो सुँगुर काटेर खाएर एकै परिवारका १६ जना सम्पर्कविहीन भएपछि प्रहरी र स्थानीयले उनीहरूको खोजी कार्य तीव्र बनाएका छन् । सम्पर्कविहीन हुनेहरूमा घरमुली ५२ वर्षीया उर्मिला हायु, उहाँका छ भाइ छोरा, पाँच बहिनी छोरी, बुहारी, जेठो ज्वाइँ र नाति नातिनी रहेका स्थानीयले बताएका छन् ।
उनीहरूले लोपोन्मुख सामाजिक सुरक्षा भत्ता एक लाख ८० हजार रुपियाँ बैँकबाट झिक्न बिहीबार नै वडा कार्यालयबाट सिफारिस लिएको वडा सचिव गायत्री भण्डारीले जानकारी दिनुभयो । वडा कार्यालयका अनुसार सम्पर्कविहीन रहेकाहरूमा ५२ वर्षीया उर्मिला हायु, २७ वर्षीया कमला, २३ वर्षीया कोमलमाया( बुहारी), २२ वर्षीया उषा, १९ वर्षीया सुजता, २१ वर्षीया अस्मिता, २९ वर्षीय राजु जेठो छोरा, र माइलो छोरा हिमाल रहेका छन् ।
त्यसै गरी १६ वर्षीय लालबहादुर, १४ वर्षीय वेगबहादुर, ११ वर्षीय लक्ष्मण, १२ वर्षीय सुवर्ण, १० वर्षीय ओमकुमारी, ४ वर्षीय रियासा र १ वर्षीय अर्जुन हायु रहेका छन् । एकलासमा रहेको घरमा सोमबार प्रहरी सहितको टोली पुग्दा कोही मानिस भेटिएका छैनन् । अरू बस्तीभन्दा टाढा एकान्तमा उनीहरूको घर रहकाले कहिलेदेखि उनीहरू हराएको भन्ने एकिन् नभएको वडा अध्यक्ष रबिनकुमार श्रेष्ठले जानकारी दिनुभयो ।
उहाँले भन्नुभयो, ‘घरभन्दा अलिमाथि उनीहरूले पाडी पालेका रहेछन् । शुक्रवारदेखि पाँडी भोकै भएकाले उनीहरू पनि त्यही दिनदेखि नै हराएको अनुमान लगाएका छौँ । उनीहरूको आफन्त पत्ता लगाई सोधखोज गरी सम्भावित ठाउँमा खोजी गर्ने कार्य भई रहेको छ ।’
वडाध्यक्ष श्रेष्ठका अनुसार भान्सा घर जल्नुका साथै भाँडाहरू अस्तव्यस्त अवस्थामा रहेका छन् । भान्सा केही जलेको समेत पाइएको छ । खोरमा पाँच वटा बाख्रा समेत भोकै अवस्थामा रहेको अवस्थामा भेटिएको छ । कुखुराहरू चरिरहेका छन् । प्रहरी उपरीक्षक लालध्वज सुवेदीले सम्पर्कविहीन भएका हायु परिवारको खोजतलास भई रहेको बताउनुभयो ।
