सुरेश धामी
बझाङ, असार २९ गते । जयपृथ्वी राजमार्गअन्तर्गत बझाङको बागथला–चैनपुर सडक खण्डको अवस्था दयनीय बनेको छ । ४५ किलोमिटरको यो यात्रामा यात्रुुहरूले गन्तव्यभन्दा पहिले निक्कै सास्ती खेप्नुपर्ने बाध्यता छ ।
सडकमा व्यापक खाल्डाखुल्डी र वर्षातको समयमा खाल्डामा पानी जम्ने समस्याले यात्रुलाई असहज भएको छ । कतै पानी भरिएका गहिरा खाल्डा, कतै चिप्ला मोड गर्दा यात्रुलाई हैरान मात्र बनाएको छैन, बिरामीका लागि त ‘सडक’ आफैँ रोग बन्न थालेको छ ।
जयपृथ्वी राजमार्गको जालेबगर, बालुवाटार, भ्यागुते खोला लगायत थुप्रै ठाउँमा हिँउदमा सुख्खा पहिरो र वर्षातको बेला पहिरो खस्दा बेलाबेलामा सडक अवरुद्ध हुने गरेको छ ।
विश्व बैंकको आर्थिक सहयोगमा करिब ३० करोड रुपियाँ खर्चेर कालोपत्रे गरिएको यो सडक काम सम्पन्न नहुँदै बिग्रिएको छ । ओटासिल प्रविधिमा गरिएको कालोपत्रे स्थानीयले ‘गुणस्तरहीन’ भएको भन्दै ठेकेदार र आयोजना कार्यालयमाथि प्रत्यक्ष आरोप लगाएका छन् ।
स्थानीयका अनुसार सडक बनाउनुभन्दा ठेकेदार र सरकारी कर्मचारीले छिटो मुनाफा कमाउनमा ध्यान दिएको कारण सढको यो अवस्था भएको हो। बर्सेनि करोडौं बजेट विनियोजन हुने गरे पनि काम समयमै नहुँदा समस्या झन गहिरिँदो छ । यो सडकका कारण यात्रु मात्र होइन, चालक र गाडी व्यवसायी पनि हैरान छन ।
गाडीको पाटपुर्जा बिग्रिनु, हर्न काम नगर्नु, इन्जिनले साथ नदिनु सामान्य बनिसकेको छ। यातायात व्यवसायी चक्र बोहराका अनुसार, बागथलादेखि चैनपुर पुग्न डेढ घण्टा लाग्ने बाटो अहिले ५ घण्टा लाग्छ ।
स्थानिय दीपकराज जोशी भन्नुभयो, निर्वाचित सांसदलाई सडकको अवस्था सुधार्न भनियो, तर कसैले वास्ता गरेन। नेताको चासो नदेखाउनु , ठेकेदारको मनपरीका कारण आम जनताको सास्ती खेप्नुपरेको उहाँको भनाइ छ । जयपृथ्वी राजमार्गको बागथला–चैनपुर खण्ड जनताका लागि कष्टको प्रतीक बनेको छ । ठेकेदार, आयोजनाको उदासीनता, राजनीतिक बेवास्ता र प्राविधिक कमजोरीको समष्टि परिणाम अहिले जनताको दुःखमा परिणत भएको छ ।
सरकारले रणनैतिक सडक पुल निर्माण, सडक पूर्वाधार विकास कार्यक्रम, राजमार्ग स्तरोन्नति तथा पुनःस्थापना कार्यक्रमलगायत विभिन्न योजनामार्फत करोडौँ रुपियाँ खर्च गरिरहेको भए पनि सोहीअनुसारको प्रभावकारी कार्यान्वयन हुन सकेको छैन । सडक पूर्वाधारको यस्तो अवस्था जारी रहँदा बझाङका बासिन्दाले दैनिक सास्ती भोग्न बाध्य भएका छन् ।
सडक डिभिजन कार्यालयका बैतडीका निमित्त प्रमुख लक्ष्मणदत्त जोशीले खाल्डाखुल्डी पुर्न तथा सडक मर्मतका लागि आगामी बजेटमा समावेश गरिएको र साउन महिनामै ठेक्का प्रक्रिया अगाडि बढाउने तरिकाले काम भइरहेको बताउनुभयो ।
उहाँले वर्षातको बेला विभिन्न ठाउँहरुमा पहिरोका कारण सडक अवरुद्ध हुने भएकाले बढी पहिरो जानसक्ने ठाउँहरुमा दुई वटा स्काइभेटर लगाएर पहिरो जाँदा पन्छाएर सडक खुलाउने काम भइरहेको बताउनुभयो ।
