दिवाकर पोख्रेल
देउखुरी, जेठ १६ गते । लुम्बिनी प्रदेशका मुख्यमन्त्री चेतनारायण आचार्यले 'लुम्बिनी बौद्ध आर्थिक शिखर सम्मेलन–२०८२' को शुक्रबार उद्घाटन गर्नु भएको छ ।
लुम्बिनी बौद्ध विश्वविद्यालय र लुम्बिनी प्रदेश सरकारको उद्योग, पर्यटन तथा यातायात मन्त्रालयको सहकार्यमा आयोजित सम्मेलनको उद्घाटन समारोहलाई सम्बोधन गर्दै मुख्यमन्त्री आचार्यले भगवान् गौतम बुद्धको शिक्षा करूणा, नैतिकता, मध्यममार्ग र सामाजिक न्यायमा आधारित रहेको उल्लेख गर्नुभयो । उहाँले यी शिक्षाहरू समतामूलक, सन्तुलित र न्यायपूर्ण आर्थिक संरचना निर्माणका लागि प्रेरणास्रोत भएको बताउनुभयो ।
मुख्यमन्त्री आचार्यले भन्नुभयो, "आजको असमानता, गरिबी, उपभोक्तावाद र पर्यावरणीय संकटजस्ता चुनौतीहरूको सामना गर्न बुद्धको विचार झनै सान्दर्भिक बनेको छ । यो सम्मेलनले बौद्ध शिक्षाको आलोकमा दिगो विकास, हरित अर्थतन्त्र, सामाजिक न्याय र मानव कल्याणमा आधारित आर्थिक दृष्टिकोणको खोजीमा गम्भीर बहस र छलफलको अवसर प्रदान गरेको छ ।"
उहाँले लुम्बिनी प्रदेश सरकारले बुद्ध जन्मस्थलमा आउने पर्यटकलाई सिङ्गो प्रदेश घुमाउने बहुआयामिक योजना अघि सारेको जानकारी समेत दिनुभयो । "यस सम्मेलनले ती योजनाहरूलाई मूर्त रूप दिन योगदान पुर्याउने छ भन्ने विश्वास लिएको छु । लुम्बिनीलाई आधार मानेर समग्र प्रदेशको विकास गर्न सकिन्छ भन्ने आत्मविश्वास हामीसँग छ । तसर्थ, लुम्बिनी क्षेत्रको समग्र विकासलाई प्रदेश सरकारले उच्च प्राथमिकतामा राखेको छ", मुख्यमन्त्री आचार्यको भनाइ थियो ।
सम्मेलनबाट प्राप्त हुने विचार, सुझाव र निष्कर्षहरूले केवल लुम्बिनी प्रदेशलाई मात्र नभई सम्पूर्ण मानव समाजलाई समुन्नत, न्यायपूर्ण र दिगो आर्थिक विकासतर्फ उन्मुख गराउने मार्गदर्शन गर्ने विश्वास उहाँले व्यक्त गर्नुभयो ।
सम्मेलनको उद्देश्य बौद्ध शिक्षाको प्रचारप्रसारसँगै लुम्बिनी प्रदेशको पर्यटन, संस्कृति र आर्थिक विकासमा योगदान पुर्याउनु रहेको छ । बौद्ध धर्मका सिद्धान्तमा आधारित रही स्थायी विकास, पर्यटन प्रवर्धन र आर्थिक सहकार्यका अवसरबारे सम्मेलनमा गहन छलफल हुने बताइएको छ ।
सम्मेलनमा अनुसन्धानकर्ता, शिक्षाविद्, आर्थिक विज्ञ, पर्यटन व्यवसायी, प्रदेश सरकारका मन्त्रीहरू, प्रमुख सचिव, सचिव तथा आर्थिक क्षेत्रसँग सम्बन्धित सङ्घ–संस्थाका प्रतिनिधिहरूको सहभागिता रहेको छ ।
