इरान–अमेरिका अप्रत्यक्ष वार्ताको अर्को चरण आइतबार ओमानमा हुने

तेहरान, वैशाख २७ गते । इरानका परराष्ट्रमन्त्री सैयद अब्बास अराघचीले अमेरिकासँगको आगामी अप्रत्यक्ष वार्ता आइतबार मे ११ मा ओमानमा आयोजना हुने निश्चित भएको जानकारी दिनुभएको छ । ओमानी पक्षले वार्ताको समय चाँडै घोषणा गर्ने  जनाएको छ ।

उक्त वार्ता ओमानको मध्यस्थतामा भइरहेको हो, जसको उद्देश्य तेहरानको आणविक कार्यक्रम तथा अमेरिकाद्वारा इरानमाथि लगाइएका प्रतिबन्धहरूको समीक्षा र सम्भावित हटाउने उपायहरूसम्बन्धी छलफल गर्नु हो । मन्त्री अराघचीका अनुसार इरान वार्तामा आफ्नो सिद्धान्तमा आधारित स्पष्ट र स्थिर अडानमा दृढ रहन्छ, यद्यपि अमेरिकी पक्षबाट विरोधाभासी सन्देशहरू आइरहेका छन् ।

उहाँले यस वार्ताअघि साउदी अरेबिया र कतारको भ्रमण गर्ने कार्यक्रम रहेको जानकारी पनि दिनुभयो। उहाँ रियाधमा क्षेत्रीय विषयहरूमा परामर्श गर्नुहुनेछ र दोहामा आयोजना हुने ‘इरान–अरब विश्व संवाद’ सम्मेलनमा सहभागी हुने तयारीमा हुनुहुन्छ । हालसम्म इरान र अमेरिकाबिच तीन चरणका अप्रत्यक्ष वार्ता सम्पन्न भइसकेका छन् । चौथो चरणको वार्ता मे ३ मा रोममा तय गरिएको भए पनि ओमानले ‘प्राविधिक कारण’ देखाउँदै स्थगित गरेको थियो । रासस/सिन्ह्वा