मकवानपुर समाचारदाता
मकवानपुर, वैशाख १८ गते । चट्याङजन्य प्रकोपको उच्च जोखिममा रहेको मकवानपुरको राक्सिराङ गाउँपालिकामा चट्याङको पूर्वसूचना दिने प्रणाली जडान गरिएको छ ।
पिपुल इन निडको आर्थिक सहयोग र साउथ एसियन लाइटनिङ नेटवर्कको प्राविधिक सहयोगमा मङ्गलबार एक कार्यव्रmमबिच चट्याङ पूर्वसूचना सेन्सरसहितको यन्त्र स्थापनाका लागि गाउँपालिकालाई हस्तान्तरण गरिएको हो ।दक्षिण एसियाली चट्याङ सञ्जालका अध्यक्ष श्रीराम शर्माले दक्षिण एसियामै पहिलो पटक नेपालमा चट्याङको पूर्वसूचना दिने प्रणाली स्थापना गर्न लागेको बताउनुभयो । उहाँले राक्सिराङ चट्याङको उच्च जोखिमको पालिका भएको भन्दै यो प्रणालीले चट्याङबाट हुने जनधनको क्षति न्यूनीकरणमा सहयोग पुग्ने बताउनुभयो ।
“पूर्वसूचना प्रणाली जडान भएपछि बादलमा विद्युतीय चार्ज उत्पन्न हुँदै गर्दा उपकरणमा भएको सेन्सरले १६ किलोमिटर क्षेत्रभित्रको विद्युतीय चार्ज थाहा पाउँछ,” चट्याङसम्बन्धी अनुसन्धानकर्ता शर्माले भन्नुभयो, “उपकरणले साइरन प्रणालीसँग जोडेर पूर्वसूचनाको सन्देश प्रवाह गर्छ ।”
उहाँका अनुसार यो प्रणाली यसअघि नगरकोटमा पनि परीक्षण गरिसकिएको छ । यो प्रणालीले चट्याङ आउनुभन्दा करिब १६ मिनेटअघि पूर्वसूचना दिने छ । जसले गर्दा खतरामा रहेकालाई सुरक्षित स्थानमा जान सन्देश प्रवाह गर्ने छ ।
गाउँपालिकाका अध्यक्ष राजकुमार मल्लले विपत्का दृष्टिले राक्सिराङ उच्च जोखिमयुक्त क्षेत्र भएकाले जनधनको क्षति रोक्न यस्तो प्रविधि आवश्यक भएको औँल्याउनुभयो । “पूर्वजानकारी पाउने व्यवस्था भएपछि हामीलाई चट्याङबाट सचेत गराउन र सुरक्षाका उपाय अपनाउन सहज हुने छ,” अध्यक्ष मल्लले भन्नुभयो । यस प्रविधिको जडानले समुदायमा चट्याङप्रति सचेतना अभिवृद्धि हुने र समयमै सुरक्षित स्थानमा जान सहयोग पुग्ने उहाँले बताउनुभयो । पालिकामा एउटा मुख्य सेन्सर र विभिन्न स्थानमा आठ वटा साइरन प्रणाली जडान गरिने भएको छ । पालिकाको वडा नं. १ को राम्चे, वडा नं. २ र ३ को भाँट्टी, वडा नं. ४ को वडा कार्यालय, वडा नं. ५ को चैनपुरमा सेन्सरसहितको साइरन, वडा नं. ६ को सिलिङेको विद्यालय भवन, वडा नं. ७ को गर्लिङ, वडा नं. ८ को पाङ्बुङ र वडा नं. ९ को प्रहरी चौकी कान्द्राङमा साइरन प्रणाली राखिने भएको छ ।
