काठमाडौँ, वैशाख ३ गते । नेपाली कांग्रेसका सभापति शेरबहादुर देउवाले स्वर्गिय चन्द्रप्रसाद न्यौपाने नेपाली कांग्रेसको निष्ठावान, सङ्घर्षशील र लोकतन्त्रवादी अनुयायी रहेको बताउनुभएको छ ।
बुधबार काठमाडौँमा जिल्ला विकास समिति गोरखाका पूर्वसभापति तथा नेपाली कांग्रेसका नेता स्व. चन्द्रप्रसाद न्यौपानेको पहिलो वार्षिक स्मृतिको अवसरमा चन्द्रप्रसाद न्यौपाने स्मृति ग्रन्थको लोकार्पण कार्यक्रममा उहाँले यस्तो बताउनुभएको हो । उहाँले स्व. न्यौपानेलाई आफूले कांग्रेसको निष्ठावान, सङ्घर्षशील र लोकतन्त्रवादी अनुयायीको रूपमा चिनेको उल्लेख गर्नुभयो । उहाँले स्व.न्यौपानेका परिवारले नेपालको राजनीतिमा, प्रजातान्त्रिक आन्दोलनमा धेरै ठुलो योगदान गर्नुभएको जिकिर गर्नुभयो ।
सभापति देउवाले भन्नुभयो, ‘‘स्व.चन्द्रप्रसाद न्यौपानेलाई मैले नेपाली कांग्रेसको निष्ठावान, सङ्घर्षशील र लोकतन्त्रवादी अनुयायीको रूपमा चिनेको छु । उहाँहरूको नेपालको राजनीतिमा, प्रजातान्त्रिक आन्दोलनमा धेरै ठुलो योगदान रहेको छ । दाजुको पाइला पछ्याउँदै चन्द्रप्रसाद न्यौपानेले नेपाली कांग्रेसमा सक्रिय भुमिका खेल्नुभयो ।’’
सोही अवसरमा सभापति देउवाले स्व. न्यौपानेका दाजु कृष्णप्रसाद न्यौपानेलाई आफूले जेलमा भेट भएको र उहाँमा धेरै नझुक्ने, जुझारु व्यक्तित्व आफूले पाएको बताउनुभयो ।
