महिला हक्की खेलाडीलाई खेल पोशाक प्रदान

काठमाडौँ, चैत २३ गते । पोखरामा प्रशिक्षणरत युवा महिला खेलाडीलाई राष्ट्रिय खेलकुद परिषद् (राखेप) की कार्यकारी सदस्य एवं नेपाल हक्की सङ्घकी महासचिब सुवर्ण श्रेष्ठले खेल पोशाक प्रदान गर्नुभएको छ । 

पोखरा रङ्गशालामा शनिबार आयोजित एक कार्यक्रमबिच श्रेष्ठले खेलाडीलाई खेल पोशाक हस्तान्तरण गर्नुभएको हो । उहाँले खेलाडीलाई उत्कृष्ट प्रदर्शनका लागि हौसला प्रदान गर्दै हक्की खेलको विकासका लागि सङ्घ निरन्तर लागिरहेको पनि बताउनुभयो ।

उहाँले भन्नुभयो, ‘‘महिला हक्कीसँगै नेपाली हक्की खेलको स्तर वृद्धि गर्न हामी प्रशिक्षण र आवश्यक सामग्री उपलब्ध गराउँदै आएका छौँ । आजको पोशाक वितरण पनि त्यसैको एक अंश हो ।’’

गण्डकीको टिमले उत्कृष्ट प्रदर्शन गर्दै आएको उल्लेख गर्दै श्रेष्ठले आगामी वैशाखबाट प्रदेश र राष्ट्रियस्तरका प्रतियोगिताहरु सञ्चालन हुने भएकोले त्यसका लागि तयार रहन खेलाडीलाई आग्रह गर्नुभयो ।

कार्यक्रममा उहाँले भन्नुभयो, ‘‘अहिले नेपालको प्रदर्शनले अन्तर्राष्ट्रिय हक्की सङ्घ र एसियाली हक्की सङ्घले प्रशंसा गरेका छन् । जुन खेलाडीले अन्तर्राष्ट्रियस्तरमा गरेको उत्कृष्ट प्रदर्शनले सम्भव भएको हो ।’’

कार्यक्रममा प्रशिक्षक हित गुरूङ, पोखरा महानगर खेलकुदका निवर्तमान अध्यक्ष दिपकबहादुर गोदार, मदन भण्डारी स्पोर्टस एकेडेमी गण्डकीका अध्यक्ष गिरमान गुरुङलगायतको सहभागिता रहेको थियो ।