फालेलुङ महिला मिनी म्याराथनमा पुष्पा च्याम्पियन

राधा लुइटेल

फिदिम, चैत २३ गते । पाँचथरको फालेलुङ गाउँपालिकामा आयोजित दोस्रो फालेलुङ महोत्सवका अवसरमा आयोजित मिनी म्याराथनमा पाँचथरकै मिक्लाजुङकी पुष्पा सेर्मा च्याम्पियन हुनुभएको छ । 

वडा नम्बर–३ र ४ को सङ्गमस्थल सिर्लिङ्गी टारमा जारी महोत्सवका अवसरमा शनिबार आयोजित प्रतियोगितामा निर्धारित १० किलोमिटर दुरी १ घन्टा ९ मिनेटमा पूरा गर्दै शेर्मा प्रथम हुनुभएको हो । फालेलुङ–६ की सरला रार्ई दोस्रो र फालेलुङ–४ की रेनुका राई तेस्रो हुनुभयो । 

सरलाले १ घन्टा १७ मिनेटमा र रेनुकाले १ घन्टा १८ मिनेटमा दौड पूरा गर्नु भएको थियो । विजेता, उपविजेता र तेस्रो हुनेले क्रमशः २०, १० र ५ हजार रुपियाँ पुरस्कार पाउनुभयो । प्रतियोगितामा १८ जना खे्लाडी सहभागी थिए ।

महोत्सव र म्याराथन फालेलुङ गाउँपालिकाको सहयोगमा तीन सिमाना जनसेवा समाजले आयोजना गरेको हो ।