अतिक्रमण घरटहरा हटाउँदै वडा कार्यालय

शिवकुमार रिजाल (काशी)
हेटौँडा, चैत २३ गते । पूर्वपश्चिम राजमार्ग बन्नुअघिको सडक क्षेत्र मिचेर घर टहरा बनाइएको भन्दै मनहरी गाउँपालिकाले अतिक्रमण हटाउने तयारी गरेको छ ।

मनहरी गाउँपालिका वडा नं ७ स्थित मनहरी खोला पुलभन्दा दक्षिणतर्फको शान्तिटोल क्षेत्रमा पुरानो सडक बाटो अतिक्रमण गरी बनाइएका घरटहरा हटाउन खोजिएको हो । ७ नं वडा कार्यालयले ७ दिनभित्र उक्त सडक खण्डका अवरोधहरू हटाउन सार्वजनिक सूचना जारी गरेको वडाध्यक्ष ठाकुरराम तितुङले जानकारी दिनुभयो ।

गत चैत २१ गते बसेको मनहरी गाउँपालिकाको कार्यपालिका बैठकले अतिक्रमित घरटहराहरू भत्काउनका लागि सूचना जारी सम्बन्धित व्यक्तिहरूलाई जानकारी गराउने निर्णय गरेको हो । सूचनालाई अटेर गरेमा स्थानीय सरकार सञ्चालन ऐन २०७४ बमोजिम गाउँपालिका आफैँले घरटहरा भत्काउने तयारी गरेको वडाध्यक्ष तितुङले बताउनुभयो । त्यसो हुँदा सातदेखि १० वटा घरका केही संरचनाहरू हटाउनुपर्ने अवस्था आउने बताइएको छ । 

पूर्वपश्चिम महेन्द्रराजमार्ग कालोपत्रे हुनुभन्दा अगाडि मनहरी खोलामा पक्की पुल निर्माण गर्नुअघि स्लाब ढलान गरेर खोलामा बाटो बनाइएको पाइएको छ । पक्की पुल बनेपछि छाडिएको उक्त बाटोमा अतिक्रमण भएको पाइएको हो । अतिक्रमण हटाएर हाल पनि सञ्चालनमा रहेको उक्त बाटोलाई फराकिलो र आकर्षक बनाउन लागिएको वडाध्यक्ष तितुङले बताउनुभयो ।