बोमलाल गिरी
नवलपुर, चैत २२ गते । नवलपुरको विनयी त्रिवेणी गाउँपालिकाका अध्यक्ष घनश्याम गिरीमाथि आक्रमण भएको छ । नेकपा एमालेबाट निर्वाचित अध्यक्ष गिरीमाथि एमाले निकटकै युवा सङ्घ, विनयी त्रिवेणी गाउँपालिका अध्यक्ष ३० वर्षीय सुदीप आचार्यले कार्यालय परिसरमै आक्रमण गरेको जिल्ला प्रहरी कार्यालय नवलपुरका प्रहरी नायव उपरीक्षक मधु नेपालले जानकारी दिनुभयो ।
आक्रमण गरी आचार्य फरार रहेको र खोजी कार्य जारी रहेको उहाँले बताउनुभयो । कुटपिटबाट अध्यक्ष गिरीलाई सामान्य चोट लागेको र अवस्था सामान्य रहेको नेपालले बताउनुभयो । नदीजन्य पदार्थ खुलाउने र क्रसर उद्योगको विषयमा गाउँपालिका अध्यक्ष र युवा सङ्घका अध्यक्ष सुदीप आचार्य सहितको टोलीबिच विवाद भएको प्रहरीको भनाइ छ ।
कुटपिट गर्ने सुदीप आचार्य अहिले सम्पर्कमा नरहेको र खोजी कार्य जारी रहेको नवलपुर प्रहरीले जनाएको छ । गाउँपालिका अध्यक्ष गिरीले मदिरा सेवन गरेका केही व्यक्तिले बिना कारण आक्रमण प्रयास गरेको बताउनुभयो ।
