शेरबहादुर सार्की
बाजुरा, चैत २२ गते । बाजुराको गौमुल गाउँपालिका–३ को अजयखोलामा झोलुङ्गे पुल बनेपछि बालबालिकालाई आउजाउमा सहज भएको छ । यो भन्दा पहिला यहाँका बालबालिकाहरुलाई विद्यालयम जानका लागि झण्डै एक घण्टा पैदल यात्रा गर्नु पर्थ्याे ।
सङ्घीय सरकारको आर्थिक सहयोगमा अजयखोलामा झण्डै दुइ सय साटी मिटर लम्बाई पुल निर्माण भएपछि अहिले यहाँका बालबालिकाहरु चार मिनेटमै विद्यालय पुग्ने गरेका छन् । माझपाली र धौलकाँडालाई जोड्ने गरी पुल बनेपछि एक घण्टा समय लाग्ने ठाउँमा चार मिनेट लाग्ने गरेको गौमुल गाउँपालिका–३ का थुम्थला आधारभूत विद्यालयको कक्षा ५ का छात्रा मनमती रोकायाले बताउनुभयो।
उहाँले भन्नुभयो, “यसअघि यो खोलामा पुल नहुँदा वर्खाको खोला तर्न डर लाग्ने गरेकोले विद्यालयमा जान नसकेपछि मेरो पढाई छुटिने गरेको थियो ।” अहिले पालिकाको पहलमा यो खोलामा पुल निर्माण भएपछि अहिले विद्यालयमा आउजाउमा निकै सहज भएको रोकायाले बताउनुभयो ।
आर्थिक वर्ष २०७९ मङ्सिरमा निर्माण सुरु भएर २०८१ वैशाखमा पुल निर्माणको काम सम्पन्न गरि औपचारीकरुपमा उद्धघाटन गरिएको हो । तर रकम भने मैले अझै नपाएको चन्द्रोदय कन्ट्रक्सन प्रालिका ठेकेदार करनसिंह विष्टले बताउनुभयो ।
पुलले बालबालिकालाई मात्र सहज नभई यहाँका माझपाली, धौलकाँडा, गर्जे, पातेका स्थानीयलाई समेत सहज आउजाउमा निकै भएको गौमुल गाउँपालिका– ३ का अध्यक्ष गोरखबादुर रोकायाले बताउनुभयो । उहाँले भन्नुभयो, “पुल त समयमा नै बन्यो सर तर ठेकेदारले पैसा भने अँझै पाएका छैन । सङघीय सरकारले रकम पास गरेको र प्रदेश सरकारले त्यो रकम अँझै रोकेको छ ।”
यस वडामा चार वटा गाउँ बस्ती छन । यी बस्तीमा झण्डै २६३ घरघुरीका र १ हजार ८६५ जनसङ्ख्या रहेको अध्यक्ष रोकायाले बताउनुभयो ।
