लीलाधर वली
घोराही, चैत २२ गते । दाङको घोराही उपमहानगरपालिका–१६ स्थित सेवारखोलामा निर्माण भइरहेको पुलको ३० प्रतिशत काम सम्पन्न भएको छ । घोराही–तुलसीपुर चारलेन सडकअन्तर्गत सेवारखोलामा गत वर्षदेखि पुल निर्माणको काम सुरु भएको थियो ।
पुल निर्माण सुरु भएको करिव डेढ बर्षको अवधिमा ३० प्रतिशत काम सम्पन्न भएको पुल सेक्टर कार्यालय नेपालगंजले जनाएको छ । घोराही–तुलसीपुर चारलेन सडकअन्तर्गत सेवारखोलामा निर्माण हुन थालेको पुलको एउटा पिलर निर्माण सकेर अर्काे पिलर बनाउने काम भइरहेको पुल सेक्टर कार्यालय नेपालगन्ज बाँकेका इन्जिनियर रामकिसुन चौधरीले जानकारी दिनुभयो । इन्जिनियर चौधरीका अनुसार डेढ बर्षको अवधिमा करिव ३० प्रतिशत काम भएको बताउनुभयो ।
पुल निर्माणको काम पछिल्लो समय सन्तोषजनक रुपमा अघि बढिरहेको इन्जिनियर चौधरीले बताउनुभयो । गत वर्ष काम गरेको रकम भुक्तानीमा समस्या हुँदा केही समय ढिलाई भएपनि अहिले पुल निर्माणको सन्तोषजनक रुपमा अघि बढिरहेको भन्दै इन्जिनियर चौधरीले भन्नुभयो, "पुल निर्माणको काम सन्तोषजनक छ । विचमा केही समस्या भएपनि अहिले समस्या छैन ।"
पुल सेक्टर कार्यालय नेपालगन्ज बाँकेका इन्जिनियर चौधरीका २३ करोड २२ लाख लागत रहेको सेवारखोला पुल निर्माणको काम एम÷एस रायमाझी कन्ट्रक्सन प्रालिले गरिरहेको छ ।
२०८० जेठ ३० गते सम्झौता भइ निर्माण कार्य सुरु भएको पुलको आगामी २०८३ जेठ २९ गते सम्पन्न गर्नेगरी ठेक्का सम्झौता भएको थियो । उहाँका अनुसार ७० मिटर लम्बाइ र २० दशमलव पाँच मिटर चौडाइ रहेको पुल बनेपछि घोराही–तुलसीपुर यात्रा गर्न सहजता हुने भएको छ । पुल निर्माणका लागि तीन करोड ५२ लाख ५० हजार रुपिया खर्च भएको छ ।
