भिरबाट लडेर मृत्यु

अनिल पराजुली
हेटौँडा, चैत २१ गते । मकवानपुरको भिमफेदीमा भिरबाट लडेर बिहीबार बिहान एकजनाको मृत्युु भएको छ । मृत्यु हुनेमा भिमफेदी गाउँपालिका –१ नयाँगाउका ४९ बर्षिय अकिलबहादुर पाख्रिन रहेका छन् ।

पाख्रिन घरबाट अन्दाजी ६० मिटर टाढा रहेको बारीको पाटाको भिरबाट लडेर मृत अवस्थामा फेला परेको जिल्ला प्रहरी कार्यालय मकवानपुरले जानकारी दिएको छ ।

खोजतलास गर्दा बिहीबार बिहान भिरमा भोर्लाको लहरामा अडकिएको अवस्थामा डढेलोको आगोले शरिर जलेको अवस्थामा फेला परेको हो  । पाख्रिनको घरबाट अन्दाजी एकसय मिटर टाढा बोकेदह सामुदायिक वनमा लागेको डढेलो हेर्न बुधबार त्यहा पुग्नुभएका पाख्रिन घर नफर्किएपछि स्थानीयले खोजी गर्नुभएको थियो ।

पाख्रीनको शव पोष्टमार्टमका लागि हेटौंडा अस्पताल राखिएको मकवानपुर प्रहरी प्रवक्ता श्यामु अर्यालले जानकारी दिनुभयो । घटनाको बारेमा थप अनुसन्धान भइरहेको उहाँले बताउनुभयो ।