राष्ट्रिय फोटो पत्रकारिता अवार्ड वैशाखमा

काठमाडौँ, चैत ११ गते । ‘राष्ट्रिय फोटोपत्रकारिता दिवस २०८२’ को अवसरमा राष्ट्रिय फोटो पत्रकार समूह (एनएफपिजे) नेपालले राष्ट्रिय फोटो पत्रकारिता अवार्ड २०२५ आयोजना गर्ने भएको छ ।

काठमाडौँमा सोमबार आयोजित पत्रकार सम्मेलनमा एनएफपिजे वैशाख १३ गते पाँचौँ फोटो पत्रकारिता अवार्ड आयोजना गर्ने जानकारी दिएको हो । अवार्ड नौ विधामा प्रदान गरिनेछ । जसमा दैनिक जीवन, खेलकुद, महिला, पर्यटन तथा संस्कृति, आर्थिक, राजनीतिक, मनोरञ्जन, स्वतन्त्र तथा समग्र फोटो पत्रकारिता समेटिएको छ । 

यस्तै प्रदेशस्तरीय अवार्डतर्फ कोशी, मधेस, बागमती, गण्डकी, लुम्बिनी, कर्णाली र सुदूरपश्चिम प्रदेशका उत्कृष्ट फोटो पत्रकारलाई सम्मान गरिनेछ । फोटो पत्रकारिता क्षेत्रमा तीन वर्षभन्दा बढी समयदेखि क्रियाशील फोटोपत्रकारले अनलाइन फारम भरी आवेदन दिन सक्नेछन् । 

आवेदनको साथमा कार्यरत संस्थाको परिचयपत्र तथा २०७९ साल वैशाख देखि २०८१ साल फागुन मसान्तसम्म खिचिएका आफनो उत्कृष्ट पाँच तस्बिर समावेश गर्नु पर्नेछ । 

यस समारोहमा देश तथा विदेशमा कार्यरत फोटो पत्रकारहरूको क्षमता र योगदानको सम्मानस्वरूप विभिन्न १६ विधामा ट्रफी, सम्मानपत्र प्रदान गरिनुका साथै साथै ‘लाइफटाइम एचिभमेन्ट अवार्ड’ प्राप्त गर्ने व्यक्तिलाई २५ हजार रुपियाँ ट्रफी र सम्मानपत्र प्रदान गरिने एनएफपिजे नेपालका अध्यक्ष प्रदीपराज वन्तले जानकारी दिनुभयो ।