राजन रावत
हुम्ला, चैत १० गते । जिल्लाको दक्षिणी क्षेत्रको चङ्खेली गाउँपालिकाले यस वर्ष गाउँ प्रहरी भर्ना गर्ने भएको छ । गाउँपालिकाको सुरक्षा आफ्नै प्रहरीद्वारा दिने उद्देश्ययले जिल्लामा पहिलो पटक गाउँ प्रहरी भर्ना गर्न लागिएको हो ।
गाउँपालिका अध्यक्ष प्यारीलाल शाहीले सार्वजनिक सूचना जारी गरेर गाउँ प्रहरी भर्ना गर्न लागिएको जानकारी दिनुभयो ।आफ्नो सुरक्षा आफैँ प्रदान गर्नका लागि गाउँपालिकाले नयाँ प्रयास गर्न लागेको उहाँले बताउनुभयो । यसमा चङ्खेली गाउँपालिकाले एक जना कक्षा बाह्र उत्तीर्णलाई वरिष्ठ गाउँ प्रहरी भर्न गर्न लागेको छ भने तीन जना गाउँ प्रहरी भर्न गर्न लागेको छ ।
गाउँ प्रहरीका लागि कक्षा आठ उत्तीर्ण हुनुपर्नेछ । गाउँ प्रहरीमा दुई जना पुरुष र एक जना महिलालाई भर्ना गर्न लागिएको हो । गाउँ प्रहरी छनोटका आधारहरु शारिरिक परीक्षण, लिखित, प्रयोगात्मक र मौखिक परीक्षा लिइनेछ ।
पुरुष गाउँ प्रहरीको हकमा १८ वर्ष पूरा भएर ३० वर्ष ननाघेको हुनुपर्नेछ भने महिलाको हकमा ३५ वर्ष ननाघेको हुनुपर्नेछ । यसका लागि गाउँपालिकाको कार्य पालिकाबाट निर्णय गरेर गाउँपालिका प्रहरी गठन, भर्नासम्बन्धी कार्यविधि यसअघि नै तयार पारिएको थियो । यसका लागि बजेट व्यवस्थापन गाउँपालिकाले गर्ने अध्यक्ष शाहीले बताउनुभयो । गाउँ प्रहरी भर्नाका लागि १५ दिने सार्वजनिक सूचना प्रकाशित गरिएको छ । जिल्लाका अन्य छ वटा गाउँपालिकाले गाउँ प्रहरी भर्ना गर्ने कार्य गरेका छैनन् ।
