मुसीकोट समाचारदाता
रुकुमपश्चिम, चैत १० गते । रुकुमपश्चिमको चौरजहारी नगरपालिकाले ‘एआई च्याटबोट’ प्रयोगमा ल्याउने भएको छ । एकीकृत सेवा प्रवाह सञ्चालन गरेर सेवाग्राहीलाई सहज बनाएको नगरपालिकाले च्याटबोटमार्फत सहज सेवा प्रवाहको तयारी गरेको हो ।
सेवा प्रवाहको सरलीकरणमा नवीनतम सूचना प्रविधिको उपयोग गर्ने उद्देश्यले च्याटबोट सञ्चालनमा ल्याउन लागिएको नगरपालिकाका उपप्रमुख ईश्वरी शर्मा बिएमले जानकारी दिनुभयो । उहाँका अनुसार नगर कार्यपालिकाको कार्यालयबाट प्रदान गरिने सेवा, आवश्यक कागजात, सेवा लिने प्रक्रिया, लाग्ने दस्तुर, प्रतिवेदन, सम्पर्क नम्बरलगायतका आवश्यक जानकारी च्याटबोटले सहज रूपमा उपलब्ध गराउने छ । यसका साथै नगरपालिका कार्यालयसँग सम्बन्धित रहेर खोजेको जानकारी तथ्यमूलक रूपमा च्याटबोटले प्रदान गर्ने उहाँले जनाउनुभयो ।
नगरपालिकाका निमित्त प्रमुख प्रशासकीय अधिकृत शेरप्रसाद ढकालले प्रविधिमैत्री सेवा प्रवाहका लागि च्याटबोट सञ्चालन गर्न लागिएको बताउनुभयो । नगरपालिका कार्यालयसँग सम्बन्धित जानकारी सहज रूपमा प्रदान गर्न एआई च्याटबोट प्रयोगमा ल्याउन लागेको उहाँले स्पष्ट पार्नुभयो । उहाँका अनुसार च्याटबोट प्रयोगमा देखिएका प्रारम्भिक त्रुटि पहिचान तथा समाधानका लागि कर्मचारीलाई अभिमुखीकरण गरिएको छ । निमित्त प्रमुख प्रशासकीय अधिकृत ढकालले च्याटबोट प्रविधिमा आधारित कम्प्युटर प्रोग्राम रहेको बताउनुभयो । यसमा दोहोरो कुराकानीसमेत गर्न सकिने छ ।
च्याटबोटले मानिससँग लेखेर वा बोलेर दुवै माध्यमबाट काम गर्ने भएकाले सेवाग्राहीलाई सहज होस् भनेर प्रयोगमा ल्याउन लागिएको उहाँको भनाइ छ । नगरपालिकामा एआई च्याटबोट प्रयोगमा आएसँगै सेवाग्राहीले घरबाटै चाहिएको जानकारी प्राप्त गरी आवश्यक तयारी गर्न सहज हुने उहाँको विश्वास रहेको छ । च्याटबोटको औपचारिक सञ्चालन एक महिनाभित्रै गरिने छ । नगरपालिकाको सेवा प्रवाहलाई प्रविधिमैत्री बनाउन लागि परेको नगरपालिकाले जनाएको छ ।
