प्रदेश सभा सदस्यद्वारा उपेक्षा गरेको गुनासो

रजनी योगी 

सुर्खेत, चैत ७ गते । कर्णाली प्रदेश सभा सदस्य जुम्कित लामा (कार्की) हुम्लाकी हुनुहुन्छ । प्रदेश सभामा बोल्ने समय पाउँदा उहाँ हुम्लाका नागरिकले भोगिरहेका समस्या उठाउनुहुन्छ । समस्या समाधानका लागि सरकारको ध्यानाकर्षण गर्नुहुन्छ । हुम्ला पूर्वाधार विकासमा पछाडि छ । शिक्षा, स्वास्थ्य, यातायात, विद्युत्को सहज पहुँच छैन । नागरिकका समस्या गनिनसक्नु छन् । पाँच केजी चामलका लागि घण्टौँ लाइन बस्नु पर्छ । खान, लाउन र बस्न सहज छैन । यस्ता यावत् समस्या छन् ।

प्रदेश सभा सदस्य लामा प्रदेश सभामा नागरिकका यिनै सरोकारलाई प्राथमिकताका साथ उठाउँदै आउनुभएको छ । आफूले बोलेका कुरामा सरकारले ध्यान नदिएको गुनासो उहाँको छ । समस्या समाधानको पहल हुन नसकेको लामा बताउनुहुन्छ । जसले उहाँलाई निराश बनाएको छ । जनताको आवाज बनेर प्रदेश सभामा सदस्य भएको तर सरकारले काम नगरिदिँदा समस्या समाधान हुन नसकेकोमा उहाँ दुःखी हुनुहुन्छ । 

उहाँ प्रदेश सभामा प्रवेश गरेको साढे दुई वर्ष पुग्यो तर जनअपेक्षा अनुसार काम गर्न नसकेको उहाँको अनुभव छ । जनताका महìवपूर्ण सवाल उठाए पनि सरकारको प्राथमिकतामा नपर्दा माग सम्बोधन हुन नसकेको लामाले बताउनुभयो । त्यसो त सञ्चार माध्यमले समेत महिला सांसदले उठाएका विषयलाई प्राथमिकता नदिएको उहाँको गुनासो छ । 

प्रदेश सभा सदस्य तथा प्रदेश मामिला समितिका सभापति कल्याणी खड्का पनि आफूहरूले उठाएका महìवपूर्ण र संवेदनशील विषयले सञ्चार माध्यममा स्थान नपाएको बताउनुहुन्छ । उहाँले महिलाले उठाएका माग जनताका हुने भएकाले सञ्चार माध्यमले पनि विशेष ध्यान दिनुपर्ने बताउनुभयो । बाध्यकारी नीति नबन्दा महिला कार्यकारी पदमा पुग्न नसकेको तथा समानुपातिकमै चित्त बुझाउन परिरहेको उहाँको भनाइ छ । अर्थ तथा प्राकृतिक स्रोत समितिका सभापति दक्षिणा शाहीले पुरुषको तुलनामा महिलालाई राजनीतिमा आउन निकै चुनौती रहेको बताउनुभयो । पूर्वजलस्रोत तथा ऊर्जामन्त्री उर्मिला विश्वकर्माले महिला त्यसमा पनि दलित तथा उत्पीडनमा परेका महिलाको सवाल प्राथमिकतामा राखिनुपर्नेमा जोड दिनुभयो ।  कर्णालीमा ४० जना प्रदेश सभा सदस्य छन् । त्यसमध्ये एक जना पनि प्रत्यक्षबाट निर्वाचित महिला प्रदेश सभा सदस्य छैनन् । प्रदेश सभामा समानुपातिक प्रणालीमार्फत महिलाले प्रतिनिधित्व गर्छन् । समानुपातिकतर्फ चयन हुने १६ जना प्रदेश सभा सदस्यमध्ये १५ जना महिला छन् । पुरुष एक जना छन् । प्रत्यक्षतर्फका २४ वटै क्षेत्रबाट पुरूष निर्वाचित भएका छन् ।