कालीकोट समाचारदाता
कालीकोट, चैत ५ गते । जिल्ला सदरमुकामसमेत रहेको मान्म बजारको खाँडाचव्रm नगरपालिकाको नयाँ भवन निर्माणका लागि जग खन्दा पहिरो गएपछि सडक अवरोध भएको छ । कर्णाली राजमार्गको छेउमा भवन निर्माणका लागि निर्माण व्यवसायीले जग खन्दै जाँदा पहिरो गएपछि सडक अवरुद्ध भएको हो ।
भवन निर्माणका लागि जग खन्दै गरेका दुई वटा एक्साभेटरको कम्पनले गर्दा सदरमुकाम बजार प्रवेश गर्ने मूल सडक भासिएको र आउजाउसमेत बन्द भएको छ । भवन निर्माणको जिम्मा लिएको आरएनसिएस बिल्डर्सले पहिरो रोक्न लगाउनुपर्ने पर्खालका लागि सम्झौतामा उल्लेख नभएकाले आफूहरूले जे जति भत्के पनि पर्खाल लगाउन नसक्ने अडान लिएपछि मान्म बजार प्रवेश गर्न कठिन भएको छ । एक हप्ताअघि खसेको पहिरोले सडक पूर्ण रूपमा बन्द हुँदा सहज बनाउनतर्फ कसैले चासो दिएका छैनन् । अति आवश्यक सवारीसाधन एम्बुलेन्स पनि ठप्प छ । धर्ती फाउन्डेसनले बिरामीको सहजताका लागि सञ्चालन गरेको एम्बुलेन्स बजारमै थुनिएको छ । फाउन्डेसनका अध्यक्ष धर्मबहादुर शाहीले भन्नुभयो, “सडक खुलाउनेतर्फ कसैको चासो छैन ।” बिरामीका लागि सेवा दिँदै आएको एम्बुलेन्स बजारभित्र थन्किएको भन्दै नगरपालिकाको भवन निर्माणका लागि काम भइरहेको बेला पहिरो गएपछि सेवा दिन नसकेको उहाँले बताउनुभयो ।
निर्माण कम्पनी आरएनसिएस बिल्डर्सका प्रतिनिधि अलिबहादुर शाहीले भवन निर्माणको लागत प्रतिवेदनमा पर्खाल लगाउने उल्लेख नभएको बताउनुभयो । पर्खाल लगाए मात्र बजारको सडक खुलाउन सकिने अवस्था छ ।
