.jpg)
दैलेख समाचारदाता
दैलेख, फागुन २२ गते । लैङ्गिक हिंसा रोकथाम र गम्भीर प्रकृतिका घटनालाई कानुनी उपचारका लागि पहल गर्ने उद्देश्यले नारायण नगरपालिकामा नगरस्तरीय सामुदायिक सुरक्षा जालो नामक सञ्जाल गठन गरिएको छ । नारायण नगरपालिकाका २५ जना अगुवा महिलाको समूहले सुरक्षा जालो गठन गरेको हो ।
महिला सशक्तीकरण मञ्च दैलेखले ‘सामुदायिक सुरक्षा जालो तथा महिलावादी आन्दोलन सुदृढीकरण कार्यक्रम’ अन्तर्गत लैङ्गिक सवालमा पैरवी गर्न अधिकारकर्मी रिना पोखरेलको संयोजकत्वमा सञ्जाल निर्माण गरेको हो । नारायण नगरपालिकासँगै लैङ्गिक हिंसामा परेका महिला कानुनी उपचार खोज्न सदरमुकाम आउने हुँदा उनीहरूलाई कानुनी प्रक्रियामा सहयोग गर्ने उद्देश्यले उक्त सुरक्षा जालो सञ्जालले काम गर्ने जनाइएको छ ।
महिला सशक्तीकरण मञ्च नेपालका अध्यक्ष सुनिता चन्दले महिलालाई लैङ्गिक सवाल, महिलामाथि हुने विभेद तथा असमानता, अधिकार प्राप्तिका लागि सञ्जाल गठन गरिएको बताउनुभयो । उहाँले महिलामाथि हुने लैङ्गिक हिंसा, विभेद न्यूनीकरणसँगै भएका घटनाको कानुनी उपचार खोज्न सञ्जालले सहयोग गर्ने जानकारी दिनुभयो । उहाँले भन्नुभयो, “जिल्लामा पहिलो पटक सामुदायिक सुरक्षा जालो गठन गरिएको र अन्य पालिकामा समेत गठन गर्ने तयारी गरेका छौँ ।”
नगरस्तरीय सामुदायिक सुरक्षा जालोका संयोजक रिना पोखरेलले महिलामाथि हुने सबै प्रकारका हिंसा न्यूनीकरण गर्ने र घटना भएका खण्डमा त्यसको वकालत तथा पैरवी गर्ने उद्देश्यले काम गर्ने बताउनुभयो । उहाँले सबै प्रकारणका हिंसा हुन नदिन समुदायस्तरमा उक्त सञ्जालमार्फत काम गरिने जानकारी दिनुभयो । सुरक्षा जालोमा सम्बद्ध महिलालाई लैङ्गिक सवाल, महिलामाथि हुने विभेद तथा असमानता, अधिकार प्राप्तिका लागि नेतृत्व विकासको आवश्यकता विषयमा आवश्यक तालिमसमेत प्रदान गरिने छ ।
महिलामाथि हुने हिंसा न्यूनीकरणका लागि सञ्जालले गर्ने काम, कर्तव्य, अधिकारका विषयमा उनीहरूलाई प्रशिक्षण गरिएको मञ्चले जानकारी दिएको छ । संस्थाले महिलामाथि हुने लैङ्गिक हिंसा दिवस अर्थात् मार्च ८ लक्षित विभिन्न कार्यक्रम गरी सचेतना जगाउने जनाएको छ ।
