मुगु समाचारदाता
मुगु, फागुन १४ गते । मुगुको नाग्म–गमगढी सडकको दुरवस्थाबारे प्रतिनिधि सभा तथा प्रदेश सभाका सदस्यहरू एवं मन्त्रीले समेत आवाज उठाउँदै आइरहनुभएको तर सरकारले उहाँहरूको आवाज सुनिरहेको छैन ।
मुगुबाट सङ्घीय संसद् प्रतिनिधित्व गर्ने वन तथा वातावरणमन्त्री ऐनबहादुर शाही, प्रदेश सभा सदस्य तथा तत्कालीन कर्णाली प्रदेशका पर्यटनमन्त्री जितबहादुर मल्लले नाग्मदेखि गमगढी लोकमार्गलाई स्तरोन्नति गर्न पटक पटक माग गर्दै आउनुभएको छ तर मागको सम्बोधन हुन सकेको छैन । जसका कारण सर्वसाधारणले निकै सास्ती खेप्नु परेको छ ।
नाग्मदेखि गमगढीसम्म सडक स्तरोन्नति नहुँदा स्थानीय तथा रारा घुम्न आउने पर्यटकले हैरानी खेप्नु परेको छ । बेला बेलामा हुने दुर्घटनाले धेरैको ज्यान पनि गएको छ । यो सडकको स्तरोन्नतिका लागि सम्बन्धित निकायमा पहल गरिरहेको तर सडक डिभिजन कार्यालय जुम्लाले सडक स्तरोन्नतिमा चासो नदिएको मन्त्री शाहीले आरोप लगाउनुभयो ।
नाग्म–गमगढी सडक स्तरोन्नति गर्न कसैको ध्यान जान नसकेको मुगमकार्मारोङ गाउँपालिका–८ का रामसिं रोकायाले बताउनुभयो । यस्तै जिल्ला नागरिक समाजका संयोजक रूपबहादुर मल्लले पनि नाग्म–गमगढी लोकमार्ग इन्जिनियरिङ मापदण्ड अनुसार नै काम नभएको बताउनुहुन्छ । सडक एक लेनको मात्र हुँदा यात्रा जोखिमपूर्ण बनेको उहाँको भनाइ छ । सडक फराकिलो बनाउन सकिने ठाउँ भए पनि त्यसतर्फ सरकारको ध्यान जान नसकेको उहाँले गुनासो गर्नुभयो । सडकलाई कम्तीमा दुई लेनको बनाउनुपर्ने उहाँको माग छ ।
लोकमार्गमा पक्की पुल निर्माण नहुँदा, खाल्टाखुल्टीले र साँघुरो मोड तथा एक लाइनको हुँदा दुर्घटनाको जोखिम उच्च रहेको सवारीचालक हेमराज हमालले बताउनुभयो । पानी पर्दा हिलाम्मे र घाम लाग्दा धुलाम्मे हुने नाग्म–गमगढी लोकमार्गमा गाडी चलाउन निकै सास्ती हुने गरेको उहाँले बताउनुभयो ।
यता सडक डिभिजन कार्यालय जुम्लाका प्रमुख प्रदीपनारायण चौधरीका अनुसार नाग्म–गमगढी लोगमार्गलाई छिटोछरितो स्तरोन्नति गर्नलाई चालु आर्थिक वर्षमा बजेटको नभएको बताउनुभयो । बजेटको व्यवस्थापन भएपछि स्तरोन्नतिको काम हुने भन्दै यस वर्ष बजेट नहुँदा केही काम गर्न नसकिएको स्वीकार गर्नुभयो ।
