• ११ फागुन २०८१, आइतबार

भैँसी बेचेर राजमतिको उपचार

blog

भैँसी बेचेर उपचार गराइरहनु भएकी राजमति बिष्ट । तस्बिरः अर्जुन बिष्ट

गोकर्ण दयाल

बैतडी, फागुन १० गते । उपचार गर्ने खर्च नहुँदा बैतडी पाटनका एक किसानले ५० हजार रुपियाँमा भैँसी बेचेर श्रीमतीको उपचार गरिरहनु भएको छ । भैँसी बेचेको रकमले उपचार गर्न नपुग्दा आफन्त नातेदार र गाउँले मिलेर आर्थिक सङ्कलन गर्ने अभियान चलाए पनि पर्याप्त रकम नउठेको उहाँको भनाइ छ ।  

पाटन नगरपालिका–१०, पनाली मल्लाथौडाकी ४५ वर्षीया राजमति बिष्टको कम्मर, टाउको र शरीरका भित्रि अङ्गमा सङ्क्रमण भई मस्तिष्कमा पानी जमेको चिकित्सकलाई उदृत गर्दै बिरामीका श्रीमान् गोपाल बिष्टले बताउनुभयो । 

राजमतिको कम्मर र टाउको दुख्ने समस्यालाई लिएर जिल्ला अस्पताल बैतडी, डडेल्धुरा लगायतका ठाउँमा उपचार गरे पनि निको नहुँदा फागुन ३ गतेदेखि धनगढीस्थित मायामेट्रो अस्पतालमा भर्ना गरिएको छ । 

उहाँको सघन उपचार कक्षमा भर्ना गरी उपचार भइरहेको बिरामीका छोरा २५ वर्षीय अर्जुन बिष्टले बताउनुभयो । उहाँले भन्नुभयो, “घरको आर्थिक अवस्था दयनीय छ । दुधालु भैँसी बेचेर अस्पताल आएको छौं । चिकित्सकले टाउकोमा पानी जमेको छ भनेका छन् । एक हप्तादेखि आइसियुमा भर्ना गरेर उपचार गर्दा करिब दुई लाख रुपियाँको बिल आएको छ ।” 

भारतमा ज्याला मजदुरी गर्दै आइरहेका अर्जुनले आमा बिरामी भएको खबर पाएपछि स्वदेश फर्किएको बताउनुभयो । गरिबीले खान लगाउन र पढ्ने खर्च नहुँदा कक्षा १० को पढाइ छाडेर भारत पसेका अर्जुनले त्यहाँ मासिक १४ हजार रुपियाँमा होटलमा काम गर्दै आइरको बताउनुभयो । 

घरको आर्थिक अवस्था दयनीय भएकै कारण अर्जुनपछिका दुईमध्ये २२ वर्षीय महेश बिष्टले आठ कक्षामै पढाइ छाडेर भारतमा मजदुरी गरिरहनुभएको छ भने कान्छो भाइ २० वर्षीय राजेशले पनि पढाइ छाडेर बस्नु भएको छ । भारतको ज्याला मजदुरी र घरको दुधालु भैँसीको दुध बेचेर जिविका चलाउँदै आएको बिष्ट परिवारको अहिले बिचल्ली भएको छ । 

आफन्त र छिमेकीले राजमतिको उपचारका लागि आर्थिक सहयोग सङ्कलन गर्ने अभियान चलाएको छिमेकी नातेदार कृष्ण बिष्टले बताउनुभयो । विभिन्न मनकारीले राजमतिको पीडालाई बुझेर ३२ हजार रुपियाँ सहयोग गरेको बिरामीका छोरा अजर्नुनले बताउनुभयो । उहाँले उपचार गर्न लाखौं रुपियाँ खर्च हुने भएपछि घरमा भएका दुई वटा बाख्रा पनि बिक्रीमा रहेको बताउनुभयो । 

बिरामी राजमति बिष्टको उपचारका लागि आर्थिक समस्यामा परेको  विषय वडाबाट आए पनि नगरपालिकाले तत्काल सयोग गर्न नसकिने पाटन नगरपालिकाका प्रमुख गौरीसिंह रावलले बताउनुभयो । उहाँले भन्नुभयो, “यो वर्ष त आर्थिक सङ्कट छ । अहिले बिरामीका आफन्तलाई आफैँ मिलाउन भनेका छौं । कार्यापालिकाको बैठक बसेर सम्भव भए जतिको सहयोग गरौंला ।” 

यता बिरामीका आफन्तले सम्पतिको नाममा भएको दुधालु भैँसी बेचिसकेकाले उपचार खर्च जुटाउन कुनै विकल्प नभएको बताउनुभयो । मनकारीलाई उपचार खर्चका लागि गुहारीरहेको बिरामी राजमतिका छोरा अर्नुन बिष्टले सुनाउनुभयो ।