चार गोलिया काठसहित तीन पक्राउ

अविनाश चौधरी
धनगढी, माघ २६ गते । साझेदारी वन क्षेत्रबाट काठ चोरी गरेको आरोपमा कैलालीमा चार गोलिया काठसहित तीन जनालाई पक्राउ गरिएको छ ।

इलाका प्रहरी कार्यालयबाट खटेको प्रहरी र सब डिभिजन वन कार्यालय मसुरियाबाट खटेको वनकर्मीको संयुक्त टोलीले उनीहरूलाई पक्राउ गरेको हो । पक्राउ पर्नेमा गौरीगङ्गा नगरपालिका–७ मट्कौना पछलापट्टीका ५१ वर्षीय दिनेश चौधरी, ४१ वर्षीय निर्मल डङ्गौरा थारू र ५४ वर्षीय सीताराम चौधरी रहेका सुदूरपश्चिम प्रदेश प्रहरी कार्यालयले जानकारी दिएको छ । 

प्रहरीका अनुसार उनीहरूले गौरीगङ्गा साझेदारी वनबाट ५७.०८ क्युफिट काठ चोरी गरेर ल्याएका थिए । दिनेशको घरमा लुकाइछिपाइ राखेको अवस्थाबाट सालको चार गोलिया काठ बरामद गरिएको जनाइएको छ । पक्राउ परेकाहरूलाई आवश्यक कारबाहीका लागि सब डिभिजन वन कार्यालय मसुरियाको जिम्मा लगाएको प्रदेश प्रहरी कार्यालयले जानकारी दिएको छ ।