राममणि दाहाल
हेटौँडा, पुस २६ गते । मकवानपुरको भीमफेदी गाउँपालिकामा भिरबाट लडेर दुई जना घाइते भएका छन् । भीमफेदी गाउँपालिका ९ स्थित साल बिसाउनेका सुनिल गोले र प्रशान्त गोले भिरबाट लडेर घाइते भएको बागमती प्रदेश प्रहरी कार्यालय, हेटौँडाले जनाएको छ ।
१३ वर्षीय सुनिल घरदेखि छ–सात कि.मि. पश्चिमतर्फरहेको देउराली सामुदायिक वनको एकपाखे भिरमा बिहीबार साँझ घाँस काट्दा लडेपछि निजलाई बचाउने क्रममा सँगै गएको साथि १८ वर्षीय प्रशान्तसमेत लड्दा घाइते हुनुभएको हो ।
प्रहरीका अनुसार दुवै जनाको हेटौँडा अस्पतालमा सामान्य उपचारपछि थप उपचारका लागि चितवन पुरानो मेडिकल कलेजमा पठाइएको छ ।
घाइते सुनिल गोलेको टाउको, अनुहार र कम्मर, खुट्टामा भित्री चोट तथा प्रशान्तको बायाँ हातखुट्टा, कम्मर, छातीमा भित्री चोट लागेको प्रहरीको भनाइ छ ।
