इमान सिं राना
रामपुर (पाल्पा), पुस २६ गते । राष्ट्रिय यू–१३ पुरुष फुटबल टिममा छनोट भएका खेलाडीलाई रामपुर नगरपालिकाले सम्मान गरेको छ । अखिल नेपाल फुटबल सङ्घ (एन्फा)ले छनोट गरेको टिममा पर्न सफल विप्लप गुरुङलाई नगरपालिकाले ५० हजार रुपियाँसहित सम्मान गरेको हो ।
पाल्पाबाट एक मात्र राष्ट्रिय खेलाडीको रुपमा छनोट हुनुभएका रामपुर–७ का गुरुङलाई नगरपालिकाले नगर सभाको १६ औँ अधिवेशनको अवसरमा बिहीबार सम्मान गरेको हो । नगर प्रमुख रमणबहादुर थापा, उपप्रमुख बालकुमारी थापा र प्रमुख प्रशासकीय अधिकृत सूर्यदर्शन पण्डितले चेक, सम्मान पत्रसहित दोसल्ला र ढाका टोपी ओढाएर सम्मान गर्नुभएको थियो ।
नगरपालिकाले राष्ट्रिय तथा अन्तराष्ट्रियस्तरमा पुग्न सफल खेलाडीको प्रोत्साहनका लागि सम्मान तथा पुरस्कृत गर्दै आएको रामपुर नगरपालिका प्रमुख रमण बहादुर थापाले बताउनुभयो । खेल क्षेत्रमा गुरुङले प्राप्त गरेको सफलताले नगरको गरिमा र पहिचानलाई थप उच्च बनाएको बताउनुभयो । अधिवेशनको अवसरमा नगरपालिकाले करारमा कार्यरत रही उमेर हदका कारण बिदा हुनुभएको कर्मचारी इन्द्रबहादुर अर्याललाई समेत सम्मान गरेको छ ।
नगरपालिकाले स्थापना गरेको कर्मचारी कल्याणकारी कोष मार्फत दुई लाख ९९ हजार १६० रुपियाँ ९८ पैसासहित दोसल्ला, प्रशंसा पत्र र ढाका टोपीले सम्मान गरिएको थियो ।
नगर सभाको अधिवेशनले चालु आर्थिक वर्षको ४० वटा योजना तथा कार्यक्रमको बजेट ८६ वटा योजनामा रकमान्तर तथा शीर्षकान्तर गरेको छ । दुई करोड एक लाख ६५ हजार रुपियाँ बजेट ८६ वटा योजना तथा कार्यक्रममा शीर्षकान्तर गरिएको उपप्रमुख बालकुमारी थापाले बताउनुभयो । साथै नगर सभा बाट स्थानीय युवा परिषद् ऐन संशोधन गरिएको नगर प्रवक्ता कपिलबहादुर खाँणले जानकारी दिनुभयो ।
