काठमाडौँ, पुस २० गते । किर्तीपुरमा अवस्थित पुष्पसदन आवासीय माध्यमिक विद्यालयले अन्तरविद्यालय स्तरीय चेस प्रतियोगिता आयोजना गर्ने भएको छ ।
विद्यालयले शनिबार पत्रकार सम्मेलन गर्दै पुस २७ देखि २९ गतेसम्म पुष्पसदन अन्तरविद्यालय अन्तर्राष्ट्रिय बुद्धिचाल प्रतियोगिता गर्ने जानकारी दिएको हो ।
विद्यालयले आगामी माघ २४ देखि २६ गतेसम्म विभिन्न उमेर समूहमा काठमाडौँ उपत्यकाव्यापी अन्तरविद्यालय टेबुलटेनिस प्रतियोगिता पनि आयोजना गर्न लागेको विद्यालयका अध्यक्ष महेश श्रेष्ठले जानकारी दिनुभयो ।
बुद्धिचाल प्रतियोगितामा स्वदेशी र विदेशी गरी तीन सय जना खेलाडीको सहभागीता रहनेछ । प्रतियोगितालाई अन्तर्राष्ट्रिय स्तरसम्म लैजाने उद्देश्यले भारतको सिक्किमबाट १० जना खेलाडीको सहभागीता गराइनेछ ।
नेपाल बुद्धिचाल सङ्घको प्राविधिक सहयोगमा स्वीस लिग प्रणालीका आधारमा सात राउन्डसम्म सञ्चालन हुने प्रतियोगितामा ११ वर्ष मुनि, १३ वर्ष मुनि, १५ वर्ष मुनिका उमेरका छात्र तथा छात्राले प्रतिस्पर्धा गर्नेछन् । शीर्षदेखि १०औँ स्थानसम्म रहने खेलाडीलाई स्वर्ण, रजत तथा कास्य पदक तथा प्रमाणपत्र प्रदान गरिने छ ।
