म्याग्दी, जेठ ८ गते । म्याग्दीमा जिल्ला समन्वय समिति गठनका लागि नेकपा (एमाले)लाई स्पष्ट बहुमत आएको छ । स्थानीय तहका प्रमुख–अध्यक्ष र उपप्रमुख–उपाध्यक्षले मतदान गर्ने जिससका लागि जिल्लामा १२ मतदाता छन् । स्थानीय तहको निर्वाचित जनप्रतिनिधि उम्मेदवार हुने जिससका लागि एमालेले एकल बहुमत बनाएको हो ।
छमध्ये तीनवटा गाउँपालिकामा अध्यक्ष–उपाध्यक्ष र बेनी नगरपालिकामा प्रमुख जितेकाले जिसस गठनका लागि एकल बहुमत पुगेको एमाले म्याग्दीका अध्यक्ष देवेन्द्र कटुवालले जानकारी दिनुभयो । सात मतदाता भएमा जिल्लाको जिसस गठनका लागि बहुमत पुग्छ । जिल्लामा एमालेबाट निर्वाचित अध्यक्ष–उपाध्यक्ष र प्रमुखको सङ्ख्या सात छन् । बेनी नगरपालिकाको वडा नंं १ रत्नेचौरबाट वडा सदस्यमा निर्वाचित राजकुमार थापा जिल्ला समन्वय समितिको प्रमुखको दावेदार देखिनुभएको छ ।
यसअघि गोलाप्रथाबाट जिल्लाको जिससमा प्रमुख–उपप्रमुख चयन गरिएको थियो । सदस्यहरू एमाले, काँग्रेस, माओवादी र राप्रपाले सहमतिमा बाँडेका थिए । काँग्रेसको छ, एमालेको पाँच र राप्रपाको एक मतदाता भएपछि गोलाप्रथाबाट चार दलको सहभागितामा एमालेका जिल्ला अध्यक्षसमेत रहनुभएका कटुवालको नेतृत्वमा जिसस गठन गरिएको थियो ।
यसपालि एमालेले मालिका, अन्नपूर्ण, मङ्गलामा अध्यक्ष–उपाध्यक्ष र बेनीमा नगरप्रमुख जितेको छ । धवलागिरि गाउँपालिकामा अध्यक्षमा विजयी भएको काँग्रेसले रघुगङ्गामा अध्यक्ष, उपाध्यक्ष दुवै जितेको छ । नेकपा (माओवादी केन्द्र)ले बेनी नगरपालिकाको उपप्रमुख र धवलागिरि गाउँपालिकाको उपाध्यक्ष जितेको छ । जिल्लाका ४५ मध्ये एमालेले २२, काँग्रेसले १७ र माओवादीले छवटा वडामा जितेका छन् ।
दुईवटा स्थानीय तहको सभामा एमाले र एकवटाको सभामा काँग्रेसको बहुमत छ । बेनी नगरपालिका, धवलागिरि र मालिका गाउँपालिकाको सभामा बहुमत पु-याउन माओवादीबाट जितेका जनप्रतिनिधि निर्णायक हुने देखिएको छ । कार्यपालिकाको सदस्य निर्वाचनका लागि दुवै दलको एकल बहुमत नपुग्ने तीन पालिकामा माओवादी निर्णायक हुने देखिएको हो ।
वारागुङ मुक्तिक्षेत्र र लोघेकर दामोदरकुण्डको कार्यपालिका सदस्य निर्विरोध
मुस्ताङको वारागुङ मुक्तिक्षेत्र र लोघेकर दामोदरकुण्ड गाउँपालिकाको कार्यपालिका सदस्य निर्विरोध चयन भएका छन् । महिलाको चार र दलित तथा अल्पसङ्ख्यक सदस्यको दुई पदका लागि आवश्यक सङ्ख्यामा मात्र एकल उम्मेदवारी दर्ता भएकाले निर्विरोध भएका निर्वाचन अधिकृतको कार्यालयले जनाएको छ । वारागुङ मुक्तिक्षेत्रको छवटै पदमा एमालेका, लोघेकर–दामोदरकुण्डको पाँच पदमा एमाले र एक पदमा कांग्रेसका उम्मेदवारको एकल उम्मेदवारी परेको हो ।
वारागुङ मुक्तिक्षेत्रको कार्यपालिका सदस्यमा महिलातर्फ कुन्जाङमो गुरुङ, माया गुरुङ, ल्हाक्चोम गुरुङ र मनकुमारी कामी, दलित वा अल्पसङ्ख्यकतर्फ मुनु दमाई र ल्हम्ङे गुरुङ निर्विरोध भएका निर्वाचन अधिकृत शारदादेवी पौडेलले बताउनुभयो । वैशाख ३० गते भएको स्थानीय तह निर्वाचनमा वारागुङ मुक्तिक्षेत्रको अध्यक्ष–उपाध्यक्ष, तीन वडाको अध्यक्ष एमालेले र दुईवटा वडामा काँग्रेसले जितेका थिए ।
लोघेकर दामोदरकुण्ड गाउँपालिकाका निर्वाचन अधिकृत नेपालहरि रानाभाटले पाँच जना एमालेका र एक कांग्रेसका उम्मेदवार कार्यपालिका सदस्यमा निर्विरोध भएका जानकारी दिनुभयो । एमालेका कर्मकेसोम गुरुङ, कृष्णप्रसाद विश्वकर्मा, छिरिङ विटीक गुरुङ, जिक्मी वाङ्दी विष्ट, पासाङभुटी गुरुङ र काँग्रेसका कचाङछुटेन गुरुङ कार्यपालिका सदस्य पदमा निर्विरोध निर्वाचित भएको निर्वाचन अधिकृत रानाभाटले बताउनुभयो ।
-square-thumb.jpg)
