काठमाडौँ, पुस ९ गते। नेकपा (माओवादी केन्द्र) निकट विद्यार्थी सङ्गठन अखिल (क्रान्तिकारी)को निर्वाचनका लागि ३२ वर्ष उमेर हद लाग्ने वा खुला गर्ने भन्ने विषयमा पुस १३ गते मतदान हुनेभएको छ।
केन्द्रीय निर्वाचन समितिका प्रमुख निर्वाचन अधिकृत मुक्ति नारायण प्रधानले मङ्गलबार अखिल (क्रान्तिकारी)को दुई चरणमा हुने निर्वाचन तालिका सार्वजनिक गर्नुभएको छ।
उहाँका अनुसार पहिलो चरणमा पुस १० गते मतदाता नामावली प्रकाशन हुने, पुस १२ गते अन्तिम मतदाता नामावली प्रकाशन हुने र पुस १३ गते उमेर हदका सम्बन्धमा बिहान १० बजेदेखि दिउँसो ४ बजेसम्म मतदान हुनेछ। यसको अन्तिम परिणाम पुस १४ गते प्रकाशन हुनेछ।
दोस्रो चरणमा पुस १५ गते केन्द्रीय पदाधिकारी तथा सदस्यको उम्मेदवारी मनोनयन दर्ता, पुस १६ गते उम्मेदवारको अन्तिम नामावली प्रकाशन, पुस १७ गते बिहान ११ बजेदेखि ४ बजेसम्म मतदान हुने कार्यतालिका रहेको छ।
