गोरखापत्र अनलाइन
काठमाडौं, पुस १२ गते । नेकपा (एमाले) का सचिव महेश बस्नेतले पार्टी अध्यक्ष केपी शर्मा ओलीमाथि लगाइएको स्थान हद हटाउने सरकारको संकेतलाई सकारात्मक र स्वागतयोग्य भन्नुभएको छ ।
सरकारले प्रमुख राजनीतिक दलका अध्यक्षमाथि स्थान हद लगाउनु उपयुक्त नहुने निष्कर्षसहित उक्त प्रतिबन्ध हटाउने संकेत गरेको सन्दर्भमा सचिव बस्नेतले यसले निर्वाचन वातावरण निर्माणमा सहयोग पुग्ने धारणा राख्नुभएको हो। उहाँका अनुसार लोकतान्त्रिक प्रणालीमा प्रतिस्पर्धी राजनीतिक दलका शीर्ष नेतृत्वलाई खुला रूपमा जनतामाझ जाने अवसर दिनु आवश्यक हुन्छ।
‘मुख्य दलका अध्यक्षमाथि स्थान हद लगाउनु उपयुक्त होइन भन्ने ठहर गर्दै सरकारले निर्वाचनको वातावरण बनाउन यो निर्णय लिएको हो भने यो निश्चित रूपमै स्वागतयोग्य छ’ बस्नेतले भन्नुभएको छ।
उहाँले राजनीतिक असहमतिका नाममा लगाइने प्रशासनिक प्रतिबन्धले लोकतान्त्रिक अभ्यासलाई कमजोर बनाउने उल्लेख गर्दै सबै दल र नेताहरूलाई समान राजनीतिक गतिविधि गर्ने वातावरण सुनिश्चित गर्नु सरकारको दायित्व भएको बताउनुभयो। सचिव बस्नेतको यो प्रतिक्रिया आगामी निर्वाचनको सन्दर्भमा राजनीतिक गतिविधि तीव्र बन्दै गएको समयमा आएको छ ।
पछिल्लो समय ओलीमाथि लगाइएको स्थान हदलाई लिएर विभिन्न राजनीतिक वृत्तमा बहस चलिरहेका बेला सरकारबाट आएको संकेतले नयाँ राजनीतिक सन्देश दिएको विश्लेषकहरूको भनाइ छ। एमालेले यस निर्णयलाई लोकतन्त्र सुदृढीकरणतर्फको सकारात्मक कदमका रूपमा लिँदै सरकारलाई निष्पक्ष र समावेशी राजनीतिक वातावरण निर्माणमा केन्द्रित हुन आग्रह गरेको छ।
