गोरखापत्र समाचारदाता
भक्तपुर, पुस ३ गते । निबन्धकार एवं संस्कृतिविद् तेजेश्वरबाबु ग्वंगः द्वारा लिखित निबन्धकृति ‘मै एक मै अनेक’ एक कार्यक्रमबिच लोकार्पित भएको छ । भक्तपुरमा आयोजित कार्यक्रममा नेपाल मजदुर किसान पार्टीका अध्यक्ष नारायणमान बिजुक्छे रोहितले कृतिको लोकार्पण गर्दै लेखकको लेखन र शैलीको प्रशंसा गर्नुभयो । भक्तपुर नगरपालिकाका प्रमुख सुनील प्रजापतिले साहित्य मात्र नभएर भक्तपुरको कला र संस्कृति संरक्षणमा पनि लेखकको विशिष्ट योगदान रहेको बताउनुभयो । कृतिकार ग्वंगः ले आफूले निबन्ध लेखेर महाकवि लक्ष्मीप्रसाद देवकोटालाई सुनाउँदा महाकविले लेख्न नछोड्नु भनेर काँधमा धाप मारेको प्रसङ्ग स्मरण गर्दै आफूले निबन्ध त्यही समयदेखि लेख्दै आएको बताउनुभयो । कार्यक्रममा साहित्यकार श्रीओम रोदन र प्रकाशक ऋषिराम पाण्डेले कृतिबारे चर्चा गर्नुभएको थियो ।
