गोरखापत्र समाचारदाता
काठमाडौँ, पुस २ गते । दी भ्वाइस अफ नेपाल सिजन–४ विजेता गायक करण राईको नयाँ गीत ‘यो के गरेको तिमीले’ सार्वजनिक भएको छ । डम्बर नेपालीको शब्द तथा सङ्गीत रहेको गीतमा गोपाल रसाइलीको एरेन्ज र देवेश राईको मिक्सिङ तथा मास्टरिङ रहेको छ ।
करण राई युट्युब च्यानलमा सार्वजनिक भएको मर्मस्पर्शी गीतसँगै यसको म्युजिक भिडियोले दर्शकलाई रुवाउन सक्छ । सान थापाको निर्देशन तथा गायक करणकै कथामा तयार भएको भिडियोमा एक प्रेमीको वियोगान्त कथा प्रस्तुत गरिएको छ । कुलतमा फसेकी एक युवतीको प्रेममा परेका प्रेमीले माया गर्दा पाएको दुःख भिडियोमा चलचित्रको शैलीमा प्रस्तुत गरिएको छ । भिडियोमा करणको साथमा मोडल कृशला तामाङलाई देख्न सकिन्छ । दिनेश पराजुलीको छायाङ्कन तथा विवेक सुनारको सम्पादन रहेको छ ।
