गोरखापत्र समाचारदाता
काठमाडौँ, मङ्सिर ३० गते । कप्तान कुशल मल्लले पहिलो पटक आफ्नो छवि अनुरूप विस्फोटक अर्धशतक बनाएपछि चितवन राइनोजले शनिबार शीर्ष स्थानमा रहेको जनकपुर बोल्ट्सलाई ३२ रनले हराएर नेपाल प्रिमियर लिग (एनपिएल) मा प्लेअफमा सँघारमा पुगेको छ ।
चितवन जितपछि सात खेलमा चार जित र तीन हारसहित आठ अङ्क बनाएर तेस्रो स्थानमा उक्लियो । चितवनले जनकपुरलाई हराएपछि पोखरा एभेन्जर्स र विराटनगर किङ्ग्स प्रतियोगिताबाट बाहिरिएका छन् । चौथो स्थानमा रहेको कर्णाली याक्सको छ खेलबाट आठ अङ्क र पाँचौँ स्थानमा रहेको काठमाडौँ गुर्खाजको छ खेलबाट छ अङ्क छ । अब विराटनगरविरुद्ध काठमाडौँको फराकिलो जित र कर्णाली याक्सको सुदूरपश्चिम रोयल्सविरुद्धको जितले मात्र चितवनलाई प्लेअफबाट वञ्चित पार्ने छ ।
पहिले ब्याटिङ गरेको चितवन राइनोजले निर्धारित २० ओभरमा पाँच विकेटको क्षतिमा १८० रनको विशाल स्कोर तयार पारेको थियो । कप्तान कुशलले ४१ बलमा तीन चौका र सात छक्कासहित सर्वाधिक ७२ रन बनाउनुभयो । कुल ५३ रनमा छँदा आसिफ शेखले जिमी निसमको बलिङमा कुशलको सजिलो क्याच छोड्नुभएको थियो । १९ औँ ओभरमा कुशललाई निसमले नै आउट गर्नुभयो । यसअघिका खेलमा सुरुवात पाएर पनि त्यसलाई ठुलो पालिमा बदल्न नसकेका कुशलले अङ्क तालिकाको शीर्ष स्थानमा रहेको जनकपुर बोल्ट्सविरुद्ध भने निराश पार्नुभएन । कुशलले मोहम्मद मोहसिनको १२ औँ ओभरमा तीन छक्का र १४ औँ ओभरमा अरनिको यादवको बलिङमा दुई छक्का र एक चौका प्रहार गर्नुभएको थियो ।
चितवनका लागि इङ्ग्लिस अलराउन्डर रवि बोपाराले पनि ३२ बलमा ४४ रनको महत्वपूर्ण पालि खेल्नुभयो । बोपाराको पालिमा पाँच चौका र एक छक्का सामेल थियो । कुशल र बोपाराले चौथो विकेटका लागि ११३ रनको साझेदारी गरी चितवनको पालि बलियो बनाउनुभएको हो । प्रारम्भिक ब्याट्सम्यान हसन इसाखिलले पनि १९ बलमा चार चौका र एक छक्का प्रहार गरी २८ रन बनाउनुभयो ।
जनकपुरका लागि दुई स्पिनर ललित राजवंशी र हर्ष ठाकरले मात्र राम्रो बलिङ गर्नुभयो । चार ओभरमा २७ रन खर्ची हर्षले हसनलाई आउट गर्नुभएको थियो । ललितले चार ओभरमा मात्र ११ रन खर्चिनुभयो । उहाँले विपिन रावल (३ रन) र बोपाराको विकेट लिनुभयो । मोहसिनले पनि एक विकेट लिनुभयो । जनकपुर जवाफमा १८ औँ ओभरको अन्तिम बलमा १४८ रनमा अलआउट भयो । न्युजिल्यान्डका अलराउन्डर चालु एनपिएलमा सबभन्दा तेज अर्धशतक बनाएपछि जनकपुरले लक्ष्य पछ्याउने सम्भावना देखिएको थियो तर निसम आउट भएपछि चितवनले खेलमा पकड बनायो । निसमले २४ बलमा पाँच चौका र छ छक्कासहित ६५ रनको विस्फोटक पालि खेल्नुभयो । निसमले १८ बलमै अर्धशतक छुनुभयो । जुन चालु एनपिएलको तेज अर्धशतक भएको छ । प्रारम्भिक ब्याट्सम्यान आसिफ शेखले २३ रन बनाउनुभयो । चितवनका लागि पाकिस्तानका अनुभवी तेज बलर सोहेल तनवीर र कप्तान कुशलले दुई दुई तथा रिजन ढकाल र अमरसिंह राउटेलाले एक/एक विकेट लिनुभयो ।
पोखराविरुद्ध काठमाडौँको सहज जित
काठमाडौँ गुर्खाजले शनिबार भएको पहिलो खेलमा पोखरा एभेन्जर्सलाई छ विकेटले हराएर नेपाल प्रिमियर लिग (एनपिएल) मा प्लेअफको सम्भावनालाई कायम राखेको छ । त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको पोखरा एभेन्जर्सले निर्धारित २० ओभरमा आठ विकेटको क्षतिमा १३८ रन बनाएको थियो । काठमाडौँ गुर्खाजले १४.१ ओभरमा चार विकेटको क्षतिमा १४२ रन बनाएर लक्ष्य हासिल ग¥यो । पोखराले ३५ बलअघि नै जित प्राप्त गरी आफ्नो रन रेट पनि सुधारेको छ ।
पोखराको एकपक्षीय जितमा प्रारम्भिक ब्याट्सम्यान स्टेफन इस्केनाजीको तेज अर्धशतकको प्रमुख भूमिका रह्यो । दक्षिण अफ्रिकामा जन्मेर अस्ट्रेलियामा हुर्केका इस्केनाजीले ३४ बलमा १० चौकासहित सर्वाधिक ६० रन बनाएर खेल पोखराको पहुँचबाट टाढा पु¥याउनुभयो । काउन्टी क्रिकेट मिडलसेक्सका लागि खेल्ने इस्केनाजीले चालु प्रतियोगितामा आफ्नो पहिलो अर्धशतक २८ बलमा पूरा गर्नुभएको हो । अर्का प्रारम्भिक ब्याट्सम्यान नेदरल्यान्ड्सका माइकल लेभिटले पनि १८ बलमा छ चौका र एक छक्कासहित ३२ रन बनाउनुभयो । यी दुई आयातित ब्याट्सम्यानले पहिलो विकेटका लागि ५.३ ओभरमा ५८ रनको साझेदारी निर्वाह गर्नुभएको थियो । अर्का विदेशी ब्याट्सम्यान जेरार्ड इरास्मसले १० बलमा अविजित २५ रन बनाएर खेल चाँडै टुङ्ग्याउनुभयो । भीम सार्कीले पनि २२ रनको उपयोगी पालि खेल्नुभयो । पोखराका लागि स्पिनर विपिन खत्रीले तीन तथा माइकल लिस्कले एक विकेट लिनुभयो ।
यसअघि वेस्ट इन्डिजका अलराउन्डर रेमन राइफरले आउट नभइकन सर्वाधिक ४१ रन बनाउनुभएको थियो । उहाँले ३० बलमा एक चौका र तीन छक्का प्रहार गर्नुभयो । दुई दिनअघि राइफरकै अविस्मरणीय प्रदर्शनले पोखराले विराटनगरलाई सुपर ओभरमा हराएको थियो तर यसपालि राइफरको अर्को सानदार प्रदर्शन हुँदाहुँदै पनि पोखराले हार टार्न सकेन । पोखराका लागि प्रारम्भिक ब्याट्सम्यान दिनेश खरेलले पनि २५ बलमा छ चौका र एक छक्कासहित ३८ रनको आकर्षक पालि खेल्नुभएको थियो । अर्का प्रारम्भिक ब्याट्सम्यान आन्द्रेस गौस शून्यमै आउट भए पनि बिनादबाब लगातार सट खेलेर रन बनाउने दिनेश पावर प्लेको अन्तिम बलमा आउट हुनुभयो । दिलीप नाथको ब्याटबाट महत्वपूर्ण २७ रन निस्किए । कप्तान कुशल भूर्तेल सात रनमा आउट हुनुभयो । पहिलो पटक खेल्दै गरेका भारतीय ब्याट्सम्यान आकर्षिक गोमेल (८ रन) पनि प्रभावित पार्न सक्नुभएन । सो पालिमा काठमाडौँका दुई तेज बलर रसिद खान र करण केसीले दुई दुई तथा स्पिनरद्वय इरास्मस र लेभिटले एक एक विकेट लिनुभयो ।
