काठमाडौं, मङ्सिर २२ गते। काभा पुरुष भलिबल क्लब च्याम्पियनसिप शनिबार सुरु भएको छ। त्रिपुरेश्वरस्थित राखेपको कभर्डहलमा भएको उद्घाटन खेलमा हेल्प नेपालले भारतको कालिकट हिरोजलाई पराजित गरेको हो।
उद्घाटन खेल एनभिए लिग विजेता हेल्प नेपाल स्पोर्ट्स क्लब र भारतको प्राइम लिग च्याम्पियन कालिकट हिरोज बिच भएको थियो। खेलमा हेल्प नेपाल स्पोर्ट्स क्लबले कालिकटलाई ३–२ को सेटमा हराएको हो। पहिलो सेट जितेर लगातार दुई सेट गुमाएको हेल्प नेपालले अन्तिममा दुई सेटमा पुनरागमन गर्दै जित निश्चित गरेको हो। हेल्प नेपालले खेल २५–२२, २०–२५, २२–२५, २६–२४, १५–१० ले जितेको थियो।
प्रतियोगितामा दुई स्वदेशी र तीन विदेशी गरेर पाँच टिम सहभागी छन्। हेल्प नेपाल, गण्डकी प्रदेश, भारतको कालिकट हिरोज, इरानको चादौर मालो र माल्दिभ्सबाट एचडीसी क्लब सहभागी छन्।
काभा पुरुष क्लब भलिबलको पहिलोपटक आयोजना भएको हो। नेपालमा यस वर्ष आयोजना भएको यो दोस्रो काभा प्रतियोगिता हो। यसअघि काभा वुमन्स नेसन्स लिग आयोजना भएको थियो।
केशब गुरुङ गोरखापत्र अनलाइनको फोटो तथा भिडियो रिपोटिङ गर्नु हुन्छ ।
