गोरखापत्र समाचारदाता
काठमाडौँ, मङ्सिर १७ गते । चलचित्र ‘बाटो : रोड टु डेथ’ अमेजन प्राइम भिडियोलगायतमा स्ट्रिमिङ सुरु भएको छ । युरोप र अमेरिकाका दर्शकले प्राइम भिडियोमार्फत चलचित्र हेर्न पाउने छन् । त्यस्तै दक्षिण एसियामा लोकप्रिय प्लेटफर्म ‘बुक माई सो स्ट्रिम’ बाट पनि निःशुल्क रूपमा चलचित्र हेर्न पाइने छ ।
काठमाडौँ फिल्म्स्को ब्यानरमा चन्दन झाले निर्माण गर्नुभएको चलचित्रका निर्देशक, लेखक तथा सम्पादक मदन थापा हुनुहुन्छ । दक्षिण भारतीय चलचित्र उद्योगको अनुभवलाई लिएर नेपाली चलचित्र निर्माण गर्नुभएका मदनले उत्कृष्ट चलचित्र बनाउन आफूले सक्दो प्रयास गरेको बताउनुभयो ।
चलचित्रमा मिथिला शर्मा, आशान्त शर्मा, सुलक्षण भारती, रक्षा थापा, उत्पल झा, पशुपति राई, राजेन थापा, आभास अधिकारी, किरण शाही, गणेश उपाध्यायलगायतको अभिनय रहेको छ ।
