काठमाडौँ, कात्तिक २७ गते । नेपाल प्रिमियर लिग (एनपीएल) को फ्रेन्चाइज टोली सुदूरपश्चिम रोयल्सले मङ्गलबार आफ्नो जर्सी सार्वजनिक गरेको छ ।
सुदूरपश्चिमका मालिक स्वतन्त्रप्रताप शाह, मार्की खेलाडी दीपेन्द्रसिंह ऐरी र टोलीका ब्रान्ड एम्बेसडर दीपक विष्टले जर्सी सार्वजनिक गर्नुभयो ।पहेँलो रङको जर्सीमा मार्की खेलाडी ऐरी र ४५ नम्बर अङ्कित छ । सुदूरपश्चिमको प्रशिक्षकमा जगत टमटा हुनुहुन्छ ।
पहिलो संस्करणमै उपाधि जित्ने लक्ष्य राखेको सुदूरपश्चिमले टोलीमा विदेशी खेलाडी न्युजिल्यान्डका स्कट कुगेलेइन, युएईका रोहन मुस्ताफा, स्कटल्यान्डका ब्रान्डन म्याकमुलेन र इङ्ल्यान्डका सेफ अली जेबलाई अनुबन्ध गरेको छ । टोलीको प्रमुख मेन्टरमा अस्ट्रेलियाका विश्वकप विजेता पूर्व क्रिकेटर ब्राड हगलाई समावेश गरेको छ ।
जर्सीसँगै सुदूरपश्चिमलले ‘सुदूरको सान मैदानमा तुफान’ बोलको आफ्नो गीत पनि सार्वजनिक गरेको छ । नेपाल क्रिकेट सङ्घ (क्यान) ले सञ्चालन गर्न लागेको एनपीएल मङ्सिर १५ देखि पुस ६ गतेसम्म त्रिवि मैदान कीर्तिपुरमा हुनेछ ।
