एकिन्द्र तिमिल्सेना
टीकापुर, कात्तिक २६ गते । टीकापुर नगरपालिका –९ की ५५ वर्षीया महिलालाई बोक्सीको आरोपमा दुर्व्यवहार भएको छ । कात्तिक २२ गते बिहीबार राति छिमेकीले बिरामी बालिकालाई फुकाउन धामीको घर गैदिनु भनेपछि सँगै गएकी ती महिलालाई टीकापुर नगरपालिका –७ का धामी सुनिल मिस्त्रीले बोक्सीको आरोप लगाइ दुर्व्यवहार गरेको ती महिलाले बताउनुभयो ।
राति ८ः०० बजेतिर धामीको घर पुगेका महिलालाई छिमेकीको बालिकालाई बोक्सी लगाएको भन्दै धामीले दुव्र्यबहार गरेका हुन् । ‘धामीले मलाई बोक्सी लगाएको हुँ भन्ने स्वीकार गर भनी दबाब दियो’ पीडित महिलाले भन्नुभयो, ‘मलाई आरोप लगाउन पाइदैन, म स्वीकार्दैन भनेपछि मेरो कपाल चक्कुले काटेर जलायो, घाँटी दबायो धामीको घरको बन्द कोठामा म एक्लै भएकाले केही गर्न सकिनँ ।’
दुव्र्यवहारमा पर्नुभएकी महिलाले आफूलाई दुव्र्यवहार गरेका भनी धामी सुनिल मिस्त्री, बिरामी बालिकासँगै जान सहयोग माग्ने बालिकाकी आमा र अर्की छिमेकी महिलाका नाममा प्रहरी चौकी कालाकुण्डामा निवेदन दिएपछि घटना बाहिर आएको हो ।
‘म (श्रीमान्) लाई बाहिर राखेर मेरो श्रीमतीलाई धामीले एक्लै कोठामा राखेको र बोक्सीको आरोप लगाइ सार्वजनिक रुपमा बेइज्जति गरेकाले हामी पीडित भएका छौं’ महिलाका श्रीमान्ले भन्नुभयो, ‘बिरामी बालिकालाई उपचार गराउनुको साटो धामीकोमा लगेर हामीलाई दोष लगाए ।’
इलाका प्रहरी कार्यालय टीकापुरका प्रमुख, प्रहरी नायव उपरीक्षक नवीन राजा बुढाथोकीले धामी र दुई जना महिलालाई पक्राउ गरिसकिएको र उजुरी दर्ता गरेर कारवाही प्रक्रीया अघि बढाइएको जानकारी दिनुभयो ।
