फडिन्द्र अधिकारी
लेखनाथ, कात्तिक २२ गते। कास्कीको पोखरा महानगरपालिका वडा नम्बर २२, पुम्दीकोटमा बिहीबार दिउँसो भएको दुर्घटनामा दुई जना घाइते भएका छन्। दिउँसो सवा १२ बजेतिर शन्तिस्तुपा नजिकै पुम्दीकोटबाट छोरेपाटनतर्फ जान लागेको बस दुर्घटना भएको हो।
दुर्घटनामा दाङको तुलसीपुर उपमहानगरपालिका ४ बस्ने वर्ष १७ की सन्ध्या रसाइली र सोही ठाउँकी वर्ष १९ की मनीषा रसाइली घाइते हुनुभएको छ। कास्कीका प्रवक्ता वसन्तकुमार शर्माले नव युग डान्स क्लब दाङबाट पोखरा भ्रमणका लागि आएको रा १ ख २१०६ नम्बरको मिनी बस दुर्घटना भएको जानकारी दिनुभयो।
चालकले नियन्त्रण गुमाउँदा बस सडक छेउमा रहेको तिँदुको रुखमा अड्किएको थियो। वडा प्रहरी कार्यालय बैदामबाट खटिएको टोलीले घाइते दुई जनालाई अस्पताल पठाएको र बाँकी २२ यात्रु सकुशल रहेको शर्माले उल्लेख गर्नुभयो। अहिले बाटोमा कुनै अवरोध नरहेको र रुखमा अड्किएको बस क्रेनको सहायताले निकाल्ने प्रयत्न भइरहेको प्रहरीले जनाएको छ।
