धारिलो हतियार प्रहार गरी श्रीमतीको हत्या प्रयास

बिष्णुप्रसाद पोखरेल
दमक, कात्तिक १८ गते । झापाको दमकमा श्रीमतीमाथि हतियार प्रहार गरी हत्या प्रयास गरेको अभियोगमा श्रीमानलाई प्रहरीले पक्राउ गरेको छ । दमक नगरपालिका वडा न.९ शान्ति चोक बस्ने ७१ वर्षीय राजेन्द्र शाहले श्रीमती ५९ वर्षीया दिलमाया ठकुरीलाई धारिलो हतियार प्रहार गरी घाइते बनाएको प्रहरीले जनाएको छ ।

मादक पदार्थ सेवन गरी श्रीमतीको दुवै खुट्टामा हतियार प्रहार गरेर घाइते बनाएपछि स्थानीयले उद्धार गरेर दिलमायालाई उपचारका लागि निम्स अस्पताल दमक पठाएको पाइएको जिल्ला प्रहरी कार्यालय झापाले जानकारी दिएको छ ।

धारिलो हतियार प्रहार गर्ने श्रीमान् राजेन्द्रलाई इलाका प्रहरी कार्यालय दमकले पक्राउ गरेको छ । घटनाको विषयमा अनुसन्धान भइरहेको जिल्ला प्रहरी कार्यालय झापाका प्रवक्ता कृष्ण चन्दले जानकारी दिनुभएको छ ।