प्रतीक इच्छुक शर्मा
सल्यान, कात्तिक १७ गते । गाउँघर सहर जतातत्तै तिहारको रमाईलो छाएको छ । तिहारलाई फूलैफूलको पर्व भनेर चिनिन्छ ।
सयपत्री, गोदावरी र मखमली जस्ता फूल तिहारमा बढी प्रयोगमा आउँछन् । देउसी भैलो गीतमा पनि फूलको चर्चा धेरै हुन्छ । यहाँका स्थानीय तहहरुले प्लास्टिकका माला आयातमा प्रतिबन्ध लगाएपछि फूलको माग बढेको छ ।
योसँगै किसानको व्यस्तता पनि बढेको छ । राप्तीराजमार्ग रहेको सल्यानको प्रमुख व्यापारिक केन्द्र श्रीनगर बजारमा विगतका वर्षहरुमा तिहारका बेला छ्याप–छ्याप्ती पाइने प्लास्टिकका माला अहिले देखिनै छाडेका छन् ।
स्थानीय सरकारले गतवर्षदेखि प्लास्टिकका फूल, गुच्छा र मालामा प्रतिबन्ध लगाएपछि सयपत्री फूलको माग बढेको छ । तिहार र छठजस्ता चाडपर्वमा प्लास्टिकजन्य फूलमाला तथा अन्य सामग्री प्रयोगमा रोक लगाइएपछि पुष्प व्यवसायी उत्साहित छन् । फूल खेती गरेर आत्मनिर्भर बन्न चाहनेहरुमा पनि हौसला मिलेको छ ।
शाारदा नगरपालिका-१ श्रीनगर नजिकै कुमार हमालले पाँच रोपनी जग्गामा सयपत्री र मखमली ढकमक फुलाउनुभएको छ । ३ महिनाअघि किसानले रोपेको फूल अहिले ढकमक्क फूलेको छ । किसान माला बनाउन र प्याकेजिङ गर्न व्यस्त छन् ।
यो वर्ष पाँच लाख रुपैयाको फुल विक्रि गर्ने लक्ष्य राखेका कुमार हमालले उत्पादित फूल काठमाडौं, बुटवललगायतका सहरसम्म पठाएको वताउनु भयो । उहाका अनुसार फुल प्रति किलो ३सय ५० रुपैयाँमा विक्रि भैरहेको छ ।
गाउँघरमै ब्यवसायिक फुल उत्पादन भएपछि फुलको ब्यवस्थापन गर्न पनि सजिलो भएको स्थानीयको भनाईछ । शारदा नगरपालिका–२, खलंगाकी प्रभा डाँगीले आवश्यकता अनुसार फूल वजारमा विक्रिका लागि राखिएको वताउनुभयो । उहाँका अनुसार अहिले गाउँघरमा सयपत्री र मखमली फुल पाईएको छ ।
शारदा नगरपालिका, त्रिवेणी गाउँपालिकालगायतका अन्य स्थानिय तहले सार्वजनिक सूचना नै जारी गरेर प्लास्टिकको फूल किनबेचमा प्रतिबन्ध लगाएका छन् । किसानले उत्पादन गरेको फूलले बजार नपाउने र प्लास्टिकका फूलमालाले प्रदूषणसमेत बढाउने भएकाले स्थानीय तहहरुले बिक्रीवितरणमा रोक लगाएका हुन् । शारदा नगरपालिकाका नगरप्रमुख प्रकाश भण्डारीले स्थानीयस्तरमा उत्पादनलाई प्रवर्द्धन गर्न र स्थानीयलाई घरमै रोजगारीको सिर्जना गर्न नगरपालिकाले प्लाष्टिजन्य फूलमा गत वर्षदेखि नै रोक लगाउँदै आएको बताउनुभयो ।
