काठमाडौँ, कात्तिक ५ गते । साफ महिला च्याम्पियनसिपको दोस्रो खेलमा नेपालले आज (सोमबार) माल्दिभ्ससँग प्रतिस्पर्धा गर्दैछ ।
नेपालले दशरथ रङ्गशालामा साँझ ५:३० बजे सुरु हुने खेलमा माल्दिभ्सविरुद्ध स्पस्ट जित निकाल्ने लक्ष्य राखेको छ । लगातार गोलको मौका पाएपनि यसअघि शुक्रबार भएको समूह ‘बी’ को आफ्नो पहिलो खेलमा नेपाल भुटानसँग गोलरहित बरबरीमा रोकिएको थियो ।
भुटानसँग इतिहासमै पहिलो पटक बराबरीमा रोकिएको नेपाललाई सेमिफाइनलमा स्थान बनाउन माल्दिभ्ससँगको खेल निकै महत्वपूर्ण रहेकको छ ।
भुटानसँगको खेलमा नेपालको अभाव खड्किएकी मुख्य स्ट्राइकर सावित्रा भण्डारी ‘साम्बा’ आइतबार राति नै नेपाल आइपुग्नुभएको छ । ‘साम्बा’ को आगमनले नेपाल थप उत्साहित बनेको छ ।
फ्रान्सेली महिला फुटबलमा शीर्ष श्रेणीको लिग क्लब अभान्ट ग्वेन्ग्याम्पबाट व्यवसायिक फुटबल खेल्दै आउनुभएकी ‘साम्बा’ले माल्दिभ्सबिरुद्ध खेल्ने बताईएको छ ।
नेपालका अन्तर्राष्ट्रिय फुटबलमा सर्वाधिक गोलको कीर्तिमान बनाउनुभएकी ‘साम्बा’ गत वर्ष फ्रान्सेली क्लबमा आबद्ध हुनुभएको थियो । साफको पहिलो खेल फिफाको अन्तर्राष्ट्रिय खेलको लागि छुट्याएको अवधि (फिफा विन्डो) मा नपरेकोले उहाँलाई फ्रान्सेली क्लबले छाड्न अस्वीकार गरेको थियो ।
यस्तै फिफा विन्डोमा खेल नहुँदा क्लब ड्युटी गर्नुपरेका कारण उहाँले गत फेब्रुअरीमा साउदी अरबमा भएको वाफ च्याम्पियनसिपको फाइनल खेल पनि गुमाउनु भएको थियो ।
महिला साफको पहिलो खेल बराबरीमा रोकिएपछि नेपाल र भुटानले एक एक अङ्क बनाएका छन् । यस्तै समूहको आफ्नो पहिलो खेलमा श्रीलङ्काले माल्दिभ्सलाई १–० गोलले हराएको थियो । समूहमा श्रीलङ्का तीन अङ्कसहित शीर्षस्थानमा छ । माल्दिभ्सले भने अङ्कको खाता खोल्न सकेको छैन ।
यस्तै समूह ‘ए’ बाट भारतले एक खेल अगावै सेमिफाइनलमा स्थान बनाएको छ । भारतले पहिलो खेलमा पाकिस्तानलाई ५–२ गोलले हराएको थियो । बङ्गलादेश र पाकिस्तानले आइतबार १–१ गोलको बराबरी खेल्दै अङ्क बाँडेपछि भारतको अगाडि बढ्ने ढोका खुलेको हो ।
पहिलो जितसँगै तीन अङ्क बनाएको भारत शीर्षस्थानमा छ । एक एक अङ्क बनाएको बङ्गलादेश र पाकिस्तानको पनि सेमिफाइनल पुग्ने सम्भावना कायम छ ।
