चल्दै गरेको रेलमा पुस्तक विमोचन

मकवानपुर समाचारदाता

मकवानपुर, असोज १५ गते  । मुक्तककार डिबी बर्तौलाको तेस्रो मुक्तक कृति विमोचनमा नयाँ अभ्यास र प्रयोग गरिएको छ । साहित्य सङ्गम मकवानपुरका अध्यक्ष एवं मुक्तक मञ्च मकवानपुरका संस्थापक अध्यक्षसमेत रहनुभएका बर्तौलाको मुक्तकसङ्ग्रह ‘उज्यालोका बाछिटा’ सोमबार चल्दै गरेको रक्सौल–दिल्ली सत्याग्रह एक्स्प्रेस रेलको बग्गीभित्र फरक ढङ्गले गरिएको हो । 

मकवानपुरका अग्रज साहित्यकार रमेश मोहन अधिकारीको अध्यक्षता तथा अर्का अग्रज साहित्यकार हयग्रीव आचार्यको प्रमुख आतिथ्यमा मुक्तकसङ्ग्रहको विमोचन गरिएको थियो । 

प्रमुख अतिथि आचार्यले मुक्तकसङ्ग्रह ‘उज्यालोका बाछिटा’ को फरक शैली र ऐतिहासिक रूपमा भएको भन्दै मुक्तकार बर्तौलाको रचना हास्यव्यङ्ग्य र सन्देशका दृष्टिले उत्कृष्ट हुने गरेको बताउनुभयो । 

सो अवसरमा साहित्यकारहरू राजबाबु पहाडी, विष्णुप्रसाद गौतम, माधव पोखरेल, मिथिला अधिकारी, किशन पौडेल र अप्सरा पुडासैनीले विमोचित सङ्ग्रहभित्रका मुक्तक वाचन गर्नुभएको थियो ।

मकवानपुर, कपिलवस्तु र बारा जिल्लाका साहित्यकार तथा साहित्य अनुरागीहरूको भारतको दिल्ली, आग्रा र वैष्णवोदेवीको भ्रमणका क्रममा उक्त कृति विमोचनको अवसर जुटाइएको थियो ।