उजेली माया जुनेली रातमा धपक्क बलेकी
बैँसको मीठो मुस्कान छर्दै मायाले खुलेकी
इन्द्रेणी रूप सुहाई खुब सुवास छर्दैछिन्
छहराबाट झरेको पानी नुहाउने गर्दछिन् ।
मनमा फल्ने वनमा डुल्ने स्वर्गकी परी हुन्
उडेर आइन् आँखामा बस्न मनकी चरी हुन्
हातमा राम्रो सुनका बाला कानमा झुम्कितार
सुनको सिक्री छातीमा टम्म शिरमा चन्द्रहार ।
मधुर बोली लजालु आँखा फुलबुट्टे चोलीको
सुन्दरी/राम्री सिपालु हाम्री नेपाली छोरीको
नाकमा फुली आँखामा गाजल टिको छ टपक्कै
रूपले उस्तै बैँसले उस्तै बलेकी धपक्कै ।
