सिरहाको राजदेवी मन्दिरमा वैशाखी मेला

सिरहा,  जेठ १० गते । सिरहाको लहान नगरपालिका–१५ स्थित राजदेवी पञ्चायती मन्दिर परिसरमा आज वैशाखी मेला लागेको छ ।  मेला भर्न देशका विभिन्न भागका साथै भारतबाट पनि श्रद्धालुहरू आएका छन् । 

लहान बजारबाट १० किलोमिटर उत्तरमा चुरे जङ्गलसँगै जोडिएको करिब तीन बिघा क्षेत्रफलमा फैलिएको राजदेवी मन्दिरमा सन्तान प्राप्ति, रोग निदान र कार्य सफलताको कामना गर्दै भक्तजन आउने गरेका मेला व्यवस्थापन समितिका अध्यक्ष वीरेन्द्र चौधरीले राससलाई बताउनुभयो । मन्दिर आसपासको क्षेत्रमा हिजोदेखि नै मेलाभर्नेको चहलपहल बढेको छ । 

व्यवस्थित ढङ्गले मेला सञ्चालन गर्न  स्थानीय प्रशासनसँग समन्वय गरेर चार सय स्वयंसेवक खटाइएको अध्यक्ष चौधरीले जानकारी दिनुभयो । मेलास्थल नजिक राजदेवी ताल, गोसाईंकुण्ड, शिव डाँडा, हात्तीदह सिमसार क्षेत्र, बानो गाउँ आकर्षक रहेकाले त्यहाँको पर्यटन प्रवर्द्धन गर्नुपर्नेमा स्थानीय बुद्धिजीवीले जोड दिएका छन् ।  

लहान नगरपालिका प्रमुख महेशप्रसाद चौधरीले राजदेवी पञ्चायती मन्दिर क्षेत्रको संरक्षणका साथै यो क्षेत्रको पर्यटकीय विकासका लागि नगरपालिकाले काम गरिरहेको बताउनुभएको छ । रासस